WKH-o me·chik til·eke, so·ote galgipa mandeko siakrip pattoko donata

NONGSTOIN: West Khasi Hills-o batanggimin April 29, 2017 bilsio bilsokkugijagipa me·chik bi·sako drae til·ekani ja·mano, uko so·ote galgipa Probit Marak-ni kosako mni Bristibar salni bako kachari siakrip pattoko donapna gita rai on·aha ine koboro janapaha.
Batanggimin 2017 bilsini April 19 tariko West Khasi Hills a·jani Shallang Police Station-ni ning·o ga·akgipa Dorangre songo, dos dakgipa mandeara, bilsokkugijagipa me·chikko rim·gittangangenba, uko drae til·ekaha aro uni ja·man apsan me·chik bi·sako so·ote galsrangahachim.
Indake ong·engon, ua obostako Shallang police station-o mamla segatenba, ua mamlako apsan police-rangan jako ra·angaha aro adita salrangni ja·mano dos dakgipa Marak-ko rim·emba da·alona kingking pattoko donatahachim.
Uandake, til·ekdraako man·e sianggipa me·chik bi·sani ma·a-paarangna, a·dok sorkari ka·sae dakchakani bak gita gong lak 3 tangkarang gamangskaaha ineba koborna parakataha.