AMPATI: South West Garo Hills a·jaoba ta·raken COVID-19 batrikrikbaengani gimin sabisini giproroaniko champengna gita Bristibar salo, South West Garo Hills a·jani Deputy Commissioner Ch Ramakrishna, COVID-19 District Task Force-ni tom·aniko Ampati-o ong·atangaha aro ia tom·anio a·jao donggipa dingtang dingtang toromni dilgiparang, NGO-rang, district administration-ni official-rang aro block development officer-rangba bakko ra·angaha.
South West Garo Hills a·jao ong·enggipa obostarangni gimin tom·anio bak ra·giparangna talataniko on·angengon, COVID-ni batrikrikaniko champengna rakgipa ja·kurangko de·na nangengaha ine South West Garo Hills a·jani Deputy Commissioner aganangenba, South West Garo Hills a·ja gimikon manderang sakbong ba una bate tom·chimongna man·jawaha ine parakangaha.
Ia somoirango, COVID-19-ni batrikrikaniko champengna songni nokni manderangna mikrakatanirangko aro dingtang bewalko ja·rikani bidingo agan-talate on·na nangenga ine janapatengon, songo noko sabisi giproroatenggiparangko name sandichina aro joltangtango donggipa manderangko noktangtango nape dongchina aro sorkarini dongimin niamrangko ja·rikchina Deputy Commissioner didiangaha.
Community COVID Management Team (CCMT)-rangko bilakdapatna nangengani gimin aganangengon, je nokdangrangon COVID man·e dingtang nape dongna nangtokenga, uandakgipa nokdangrangna pilak nanga dakchakanirangko on·china ua, CCMT-rangko aro songni nokni dilgiparangko didiangaha.
Category C aro D case-rangko sanna gita district Health team-ni tarisamsoanirangko aro bilsi 18-oni bilsi 44 ong·gipa manderangko tika su·na biming segatanirangko nipilangengon, Ampati Civil Hospital-o oxygen-rang chu·ongjaenga ong·ode West Garo Hills a·jani health team-rang baksa agangrikchina Deputy Commissioner didiangaha.
Assam a·doko obostarang namjabatroroengahani gimin Assam-oni re·rurae kam ka·enggipa health aro gipin official-rangna kamtangon donge kamrangko ka·na man·na gita dongchakani biaprangko tarie on·china gitaba ua dingtang dingtang office-rangko ge·etangaha.
South West Garo Hills a·jao COVID-19 giproroengani gimin songrango Aadhar-na biming segataniko da·o dipet dontongatchengchinaba Deputy Commissioner ge·etangaha.
