A·dokni CM Songsak Prime Hub-ona re·ange game ge·e cha·giparang baksa agangrika

TURA: Mongolbar salo, Meghalaya a·dokni Chief Minister Conrad K Sangma, East Garo Hills a·jani Songsak Prime Hub-ona re·angenba, game ge·e cha·giparang, farmers producers group-rang aro bading chiwalgiparang baksa agangrikangaha. Ia program-ko ong·atanio Williamnagar-ni MLA aro a·dok sorkarini Chief Whip Marcuise Marak-ba dongpae bak ra·angaha.
Ia program-ko ong·atanio farmer producer group-rangna cheque-rangkoba Chief Minister-ni jakchi suale on·angjolaha aro Meghalaya Basin Development Agency-ni dakchakanichi Tura Walbakgre-ni Bakdil Training Centre-o jagittamna Masonry/Plumbing-ni training-ko ong·atanio bak ra·gipa manderangnaba ia tom·anio Chief Minister-ni jakchi, certificate-rangko suale on·angaha.
Ia program-ko ong·atanio a·dokni Chief Minister, game ge·e cha·giparang baksa agangrikengon, a·doko game ge·e cha·enggipa manderangna sorkari dakchakanirangko on·na gita kamko ka·enga aro game ge·e cha·enggiparangni neng·nikanirangko ma·sie ra·na gita dingtang dingtang program-rangko ong·atrongenga ine parakangaha.
“Songo noko game ge·e cha·enggipa manderangni neng·nikanirangko ma·sie ra·na gitasa chinga Songsak-ona re·baaha aro manderangna namgni ong·nagipa program-rangkosa sorkari tarie on·na nangnikenga,” Chief Minister aganaha.
Chief Minister-ni aganani gitade, game ge·e cha·giparangko, producer group-rangko aro agri entrepreneur-rangko dakchakna gita ia Prime Hub-rangba sorkarini ra·gatgipa kamrangoni mingsa ong·enga aro iachi sorkari, game ge·e cha·giparangna, uamangni pale sim·e man·anirangko aro kamrangko namdapatna gita dakchakanirangko on·enga.
Meghalaya a·dokni gipin biaprangoba sorkari, iandakgipa Prime Hub-rangko kulina miksongenga ineba ia tom·anio Chief Minister aganaha.
Ia tom·anio game ge·e cha·giparangni dingtang dingtang neng·nikanirangkoba Chief Minister knatime ra·angenba, pilak nanga dakchakanirangko on·na ku·rachakangaha.

Get real time updates directly on your device, subscribe now.

Comments are closed.