COVID man·giparangna cha·ani bosturangko on·na Salmanpara MLA ku·chaka

TURA: South West Garo Hills a·jani Salmanpara jolrango COVID-19 man·gipa manderangna ma·manti cha·ani bosturang, jekai mirong, dal, cha·ani to aro uandakgipa bosturangko suale on·na gita Mongolbar salo Salmanpara-ni MLA Winnerson D Sangma ku·rachakaniko on·angaha.
COVID-19 tikani bidingo manderangni ma·sisretanirangko talate on·na gita Mongolbar salo, community awareness-cum-mobilisation program-ko Zikzak C&RD Block-ni ning·o donggipa Anangpara aro Salmanpara songrango ong·atanio Salmanpara-ni MLA, ku·rachakaniko on·angaha.
Ia program-ko Sangma-ni didianichi, Zikzak-ni block development officer aro ICDS department nangrime ong·atangaha aro ia tom·anio Zikzak-ni BDO DD Sangma, Zikzak-ni CDPO Torali K Marak aro gipinrangba dongpae bak ra·angaha.
Ia song damgnion Salmanpara-ni MLA WD Sangma, mongsonggipa sokgipa ong·e jinmana aganprakengon, COVID-19 tikani bidingo tol·e jangbingbanganirangko bebera·jachina aro an·tangtangko naljoke rakkina man·na gita tikarangko su·e ra·china songni manderangko didiangaha.
COVID-19-ko warachakna gita kamrangko ka·engani gimin Anganwadi aro ASHA worker-rangkoba mittelpilangengon, a·dokni opposition Congress dol, sorkari baksa nangrime ASHA aro Anganwadi worker-rangni man·gniko bariatna kam ka·enga ine Sangma parakataha.
Ia jolrango COVID-19 man·gipa manderangna merong kg 5, dal kg 1, cha·ani to ata litre aro bi·sarangni cha·aniko suale on·anggen ine ku·rachakaniko on·angengon, ia bosturangko skanggipa uni constituency-ni song damchetna on·angchenggen aro ja·mano gipin songrangnaba sualatgen ine Congress MLA parakataha.
Ia program-ko ong·atanio dongpae jinmana aganprakanggipa gipin manderangara, South West Garo Hills a·jani District Medical & Health Officer Dr Lily Sengme Marak, Senior Medical Officer Dr Lydia Marak aro gipinrang ong·a.

Get real time updates directly on your device, subscribe now.

Comments are closed.