WGH-oba July 26 tarikona lockdown-ko ra·dodapa

Office aro dokkan kuliani somoirangko adita dingtangata

TURA: West Garo Hills a·jaoba COVID-19-ni batrikrikaniko warachakangkuna gita lockdown-ko July 26 tarikona radodapataha ine West Garo Hills a·jani Deputy Commissioner Ram Singh u·iataha.

Deputy Commissioner-ni u·iatani gitade, gital u·iataniko on·taikujaskal East Garo Hills a·jani ning·o donggipa skul aro college-rangko chipe donangkugen indiba skul aro college-rangko chipe donengmiting somoio internet gita class-rangko ra·skana man·gen.

Dokkanrangko kuliani bidingo talataniko on·angengon, Tura-ni mongsonggipa bazar aro jilla jolgimikon nangchongmotgipa dokkanrang, jekai galamal, dud, be·en, me·su aro uandakgipa dokkanrangko pring 8:00 bajioni attam 1:00 bajiona kulina man·gen indiba gipin biaprangode dokkanrangko pring 8:00 bajioni attam 4:00 bajiona kulina man·gen ine Deputy Commissioner u·iataha.

Garirangkoba odd/even nomboro pangchake re·rurana gita district administration, niamko donangkuaha aro Deputy Commissioner-ni u·iatani gitade, Sombar, Budbar aro Sukrobar salrango 2,4,6,8 aro 0 nomborchi bon·gipa garirang re·rurana man·gen aro Mongolbar, Bristibar salrangode 1,3,5,7 aro 9 nomborchi bon·egipa garirang re·ruraskana man·gen.

Sorkari office-rangkoba, ma·mong sorkarini office-rangko man·chape Tura jilla ning·o donggipa office-rangkode pring 10:00 bajioni attam 1:00 bajiona kulianggen indiba West Garo Hills a·jani gipin biaprangode pring 10:00 bajioni attam 4:00 bajiona kulianggen ine DC parakataha.

Indake ong·genchimoba attam 5:00 bajioni pring 5:00 bajionade walantian curfew ong·engani gimin 5:00 bajini ja·mande gari gorarang re·rurana man·jawaha ine DC u·iataha.

Deputy Commissioner-ni u·iatani gitade, West Garo Hills a·jaoba weekend lockdown-ko chu·gimik ra·gatengani gimin July 23 tarik attam 2:00 bajioni a·bachenge July 26 pring 5:00 bajionade dokkanrang aro garirang skatang re·rurana man·jawa.

Get real time updates directly on your device, subscribe now.

Comments are closed.