SHILLONG: Opposition Congress, uamangni a·dok sorkariko rikengmiting somoio bang·a manderangni janggiko dingtang dingtang a·selrangchi so·otangahaoba da·o uamang an·tangtangko biming man·atna sikjae jaksugalenganina NPP matnangaha.
NPP-ni palo agan-ku·attimgipa aro a·dok sorkarini chief whip, Marcuise N Marak, Opposition Congress dolko uamangni bilsi 40 batpile a·dok sorkariko challaiangani somoio an·tangtangni dakgualako menggo ki·pindapna jotton ka·enga ine aganengon, “2005 bilsio Congress-ni bilo dongmitingo Garo Hills-o MBOSE-ni mamlao mangmangba sak 9 dos grigipa manderangko so·otangaha, jeon Turao sak 4 aro Williamnagaro sak 5. Uandake uamangni chasongo mande so·otako mesokatna gita man·kua,” ine parakataha.
“Uamangni chasongo, adita sak police official-rangko man·chape, bang·a changrangon bobil dol baksa gogrikani aro mande so·otanirangko nikna man·achim,” ineba ua agandapaha.
Marak, Congress matnange sing·doatskaengon, “uamang maini gimin a·dok sorkariko matnangenga, Congress-ni chasongo mai ong·ahachim, uamang an·tangtangni administration-ko mangmangba talchengjama,” ine aganaha.
Uni parakani gitade, uamang skango sorkariko challaiangmitingo an·tangtangko dos dongja ine agana gitan chol dongsrangja, aro indake jekolame roani palde, uamang opposition-ko bilakatna, namgipa ong·na jotton ka·na nangskaachim.
“Uamang sorkarini kosako agankolame, jegale matnange roani palde, mikkangchini namgnina a·doko bang·a namgijagipa kamrangko namatna gita apsan ba ku·cholsan ong·e kamrangkosa ka·na nanga,” ineba ua aganangkuaha.
“A·dokko namdap-sildapatna aro a·dokko nambate challaiangkuna gita an·ching mikkangchi ku·cholsan ong·e kamko ka·angnasa nanga,” ineba Marak agandapaha.
Congress sorkari rikmitingoba manderangko bang·en so·otjok: Marcuise
Date:
Share post:
