TURA: Rabha Hasong Autonomous Council (RHAC)-ko Sixth Schedule-o napatahaode Assam a·dokni Goalpara aro Kamrup a·jarango songdong a·chaenggipa A·chikrang jakgitelaniko man·jawaha ine United Garo Autonomous Council Movement Committee (UGACMC) parakatenba, RHAC-ko Sixth Schedule-o napatna Assam sorkarini manchienganiko jegalna gita re·baenggipa September-ni 8 tariko Goalpara-ni DC office mikkango asonge jingjengatanggen ine parakataha.
Assam a·doko songdongenggipa A·chikrangna ru·uta bilsirangonin dingtang Garo Autonomous Council (GAC)-ko on·china dabiengahani gimin RHAC-ko Sixth Schedule-o napatna skang Assam-o songdongenggipa A·chikrangna GAC-ko on·chengchina gitaba UGACMC dabiangaha.
“RHAC-na Sixth Schedule-ni gadangko on·ahaode Goalpara aro Kamrup a·jarango songdongenggipa A·chikrang pangnajolnan jakgitelaniko man·jawaha maina RHAC-na Sixth Schedule gadangko on·ahaode an·ching A·chikrangba uamangni ning·osa dongna nangaignok. Uni gimin RHAC-ko Sixth Schedule-o napatanio A·chik songrangkode on·na man·jawa,” ine UGACMC-ni general secretary Thengsil Sangma talatangenba, iako jegalna gitasa re·baenggipa September-ni 8 tariko Goalpara-ni DC office mikkango jinma asonge jingjengatna miksongenga ine parakataha.
RHAC-na Sixth Schedule gadangko on·na skang GAC-ko Assam sorkari on·jagenchimode Assam a·doko songdongenggipa A·chikrang mikkangchi bilakbate jingjengatanirangko dakanggen ineba UGACMC mikrakataniko on·angaha.
September-ni 8 tariko UGACMC-ni asonge jingjengtaniko dakanio re·bae bakko ra·etokchina gitaba committee-ni dilgiparang, Assam a·doko donggipa A·chik songantini gaonburarangko aro dingtang dingtang A·chik dolrangko didiataha.