Ia tom·anio East Garo Hills Nokma Council-ni secretary aro Williamnagar-ni Nokma, jinmana aganprakangengon, Sixth Schedule-o village council-ko ra·gataniara chengoni A·chik songrango jakkalbaenggipa niamrangko aro A·king Nokmarangna on·gimin bilrangko ra·sekani gita ong·gen, uni gimin A·chik a·song gimikni Nokmarang, ia village council-ko raken jegalsoenga ine parakataha.
Ia tom·anio GSU Williamnagar-ni secretary Alestbirth M Sangma-ba jinmana aganprakengon, Garo Hills-ona village council-ko ra·bagenchimode A·chikrangni daka rikaniko aro niamrangko dingtangatani gita ong·gnok aro iako GSU raken jegalenga aro iako jegalanio Garo Hills gimikni A·king Nokmarangna chakpaaniko on·enga ine parakataha.
Ia tom·anio Williamnagar-ni MDC Alphonsus R Marak, village council-ko ra·gatani bidingo talataniko on·angengon, ma·mong sorkarioniko songo noko namroro silroroataniko ra·bana Indian Constitution-ni 260 Article-ni ning·o donggipa Finance Commission-o pangchakesa Sixth Schedule-o village council-ko ra·gatna miksongenga indiba ia finance commission-ara panchayati jolrangnasa nangchakeaniko ra·bagipa ong·ani gimin iako taridapna nanggenchimode A·chik songrangoba village council gitasa tangka paisarang sokbagnok ine parakangaha.
Ia tom·anio Niksamso A·chik Society-ni secretary Tengrak R Marak-ba aganprakengon, village council-ko A·chik a·songo ra·gatahaode gipin jatrangba songo noko dilgiparang ong·na man·gnok aro Garo Hills-ni bang·bata biaprangon A·chik songrangko gipin jatrangsa ra·sekengahani gimin ian A·chikrangna gimaani ong·batgnok ine Sixth Schedule-o village council ra·gataniko raken jegalangaha.
Ia tom·anio Williamnagar Mothers Union-ni president Mehaline Sangma aro A·chik Association for the Protection of Environment (AAPE)-ni secretary Joshua R Marak-ba jinmana aganprakengon, Sixth Schedule-ko taridapanio village council-ko ra·gatna manchienganiko raken jegalangenba, A·chik jatko chel·chakna gita iandakgipa niamrangko A·chik a·songo ra·gatjachina A·chik dilgiparangko didiataha.