Porikkarango name chu·sokgipa chatro chatrirangna laptop-rangko suala

 

SHILLONG: Ia bilsini dingtang dingtang board porikkarang, chong·motan MBOSE, CBSE, ICSE, ISC aro uandakgipa porikkarango nambatgipa mark-rangko man·e chu·sokgipa chatro chatrirangna Mongolbar salo, Meghalaya sorkarini gita laptop-rangko suale on·angaha.

Ia laptop-rangko suale on·na gita dingtangmancha program-ko Information Technology & Communication (IT & C) Department-ni gita Shillong songjinmani Yojana Bhavan-o ong·atangaha aro ia program-ko ong·atanio a·dokni IT&C Minister Hamletson Dohling, mongsonggipa sokgipa ong·e bakko ra·angaha.

Chatro chatrirangna laptop-rangko suale on·angani somoio a·dokni IT&C Minister, jinmana aganprakangengon, porikkao chu·sokgiparang ong·na gita bimchipe poraiahani gimin chatro chatrirangko mittelpilangaha.

Ia chatro chatrirangni namgipa mark-rangko man·e chu·sokgipa ong·ahani gimin ua ma·a paarangko aro skigiparangkoba mittelpilangaha.

Ia chatro chatrirangni chu·sokgipa ong·anina uamangni ma·a paarang aro skigiparangsan ong·aigija sorkariba rasong chae ia somoio uamangna mande ra·pilskaaniko dakenga ineba Dohling aganaha.

A·songna aro jatna mikkangchi dangdike on·giparang ong·na man·na gita apsan daken bimchipe poraiangkuchina aro kamtangtango kakketgiparang ong·china gitaba ua chatro chatrirangko didiangaha.

Ia tom·aniko ong·atanio IT&C department-ni Commissioner & Secretary MR Synrem aro IT&C-ni Director KL Nongbri-ba dongpae jinmana aganprakengon, chatro chatrirangko gisiko nange poraichina didianiko on·angaha.

Get real time updates directly on your device, subscribe now.

Comments are closed.