TURA: Re·anggipa Robibar walo aro Sombar pringo Garo Hills-ni damgittam biaprango garirang a·sel ong·aha aro biap damsaode bike-ko salgipa mande saksa so·otako man·aha.
Mikkarang jimbee waengani a·sel aro nangana bate ta·rakdugae salani a·sel ia garirang a·sel ong·ahakon ine police-rang chanchichipenga.
Koborko on·ani gitade, Songsak Megapgre jolo gari a·sel ong·ani bilongbata aro ua somoio motorcycle bolsa, mikkarang jimbee waengmiting somoio Nengsamgre songo maruti alto gari baksa su·gake a·sel ong·aha.
Ua somoio Rongbing Boldek songoni Wilin R Marak minggipa mande saksa, an·tangni ML-13A 2084 bajaj pulsar motorcycle-o ML-10 4554 gariko su·gakeaha aro a·sel ong·anio ua janggitangko gimaatna gita nangaha.
Iana skang, East Garo Hills a·jani Samanda-o aro South Garo Hills a·jani Siju reserve joloba garirang a·sel ong·aha ine kobor on·aha.
Robibar attamo mande sakgni, bike-o songreangengmiting somoio Siju reserve jolo ramaoni tang·srotangenba a·sel ong·aha aro uamang sakgnian siboke adita saknaanirangko man·aha. Uamangoni bilsi 19 ong·kuenggipa pante saksade skoo mata bu·ako man·enba bilongbate saknaanirangko man·aha aro uko sanna gita gipin biapona ra·angna nangaha ine kobor on·aha.
Samanda-oba bike bolsa aro gari bolsa chatinggrike a·sel ong·ahachim indiba ia a·sel ong·anio dolgnian bang·gija saknaanirangkosan man·skaaiaha ine kobor on·aha.
