TURA: A·gilsakni gipin biaprango gitan digital-ni gita dingtanganiko ra·bana miksonganio dingtangmancha Science (Physics)-ni bidingo agan-talate on·ani program-ko Bristibar salo, Tura-ni Don Bosco College Teachers Education (DBCTE)-ni Seminar Hall-o ong·atangaha.
Ia program-ko Tura Don Bosco College-ni Physics department, AQAC aro college-ni Alumni Association baksa nangrime ong·atangaha aro ia program-o Science stream-ko poraienggipa aro kam ka·enggipa manderangoni sak 150-mangni gita bakko ra·angaha.
Ia program-ko ong·atanio APAC Ericsson-ni ning·o donggipa Business Strategy-ni Head Abhijit Dutta, program-o bak ra·giparangna aganprakangengon, a·gilsako digital-ni gamchatani gimin talataniko on·angenba, an·tangni bilsi 17-na dingtang dingtang multinational company-rango kam ka·e u·i-ma·sie ra·gimin kamrangni bidingo parakangaha. Ia sal somoirango 70 percent-mangni gita company-rangan non-engineering chatro chatrirangkosa kamna rimenga ine janapatengon, basic science-ko skie ra·angkuchina gita chatro chatrirangko didiangaha.
Ia program-ko ong·atanio West Garo Hills a·jani District Maternal & Child Health Officer aro Alumni Association-ni secretary Dr Ivonne M Sangma-ba dongpae jinmana aganprakengon, COVID-ni tikarangko tarianio maikai ia digital-ni kamrang dakchake on·ahachim, uarangni gimin aganangaha. COVID-ni tikarangko su·e ra·na nangengani giminba ia tom·anio ua bak ra·gipa sakantikon didiangaha.
Ia program-ko ong·atanio jinmana aganprakanggipa gipin manderangara, Don Bosco College-ni Principal Fr Bivan R Mukhim, college-ni coordinator Dr Arindham Ghosh, Physics Department-ni Head Mahidhar Rajbongshi aro gipinrang ong·a.
