SGH-o MeECL office-ko NGO-rang kam ka·na on·gija jingjengata

 

TURA: South Garo Hills a·jao bijoli on·ani kamrangko namdapatchina gita jasa skangan sorkarina memorandum-ko on·manahaoba da·onan maming ja·kurangko de·kujaenga ine matnangenba, South Garo Hills a·jani dingtang dingtang NGO-rang, jekai GSU, ADE, FKJGP, AHAM, GSMC aro uandakgipa gipin dolrang, Mongolbar sal dipet Baghmara-o donggipa MeECL office-ko picketing ka·na ba kam ka·na on·gija jingjengatna a·bachengataha ine u·iataha.
NGO-rangni parakatani gitade, South Garo Hills a·jako man·chengaonin MeECL-ni sub-divisional office-ko songahaoba a·jao songdongenggipa manderangna bijoliko suale on·anio maming namdapanirang dongkujaengachim aro iani bidingo NGO-rang, changni chang sorkarina u·iatahaoba maming ja·kurangko de·kujaengachim.
“South Garo Hills a·jao songe on·gipa power line ba utility pole-rangara mikka balwa rakani somoirangode nosto ong·rongaia aro iandakgipa krongrangara, Siju aro Aretika-ni buring bolgrimrangosa ong·e da·o gita wachi ba mikka balwarang ta·rakani somoiode bolrang be·dape ba bijoli silitingrang chote nosto ong·atako man·ronga. Wachini somoirango bijoli nosto ong·ahaode ia nosto ong·gipa bakrangko taripilna gita komibeoba salgittamrangkode nangaiani a·selan jolo songdongenggipa manderang neng·nikanirangko chagrongna nangrongenga,” ine NGO-rang parakatenba, South Garo Hills a·jao songdongenggipa manderangni neng·nikanirangko chel·chakna gita 132 KV grid power line-ko songe on·na nanga ine dabiangaha.
South Garo Hills a·jao donggipa transformer-rangni gimin janapatengon, a·jani bang·bata biaprangon transformer-rang gitcham ong·tokahani gimin nosto ong·rongenga aro ia transformer-rangni biapo ta·raken gitalko on·na nanga ine NGO-rang dabiangaha.

Get real time updates directly on your device, subscribe now.

Comments are closed.