SHILLONG: Meghalaya a·dokni changbongana Chief Minister ong·anggipa Donwa Dethwelson Lapang, Congress dolona re·bapilna nangnikenga ine MPCC-ni president aro Shillong-ni Lok Sabha MP Vincent H Pala, a·kangataha.
Lapang baksa agangrikna AICC ra·chakahaon Congress dol, uni re·bapilanina nisengsoenga ineba Pala aganaha.
Congress dolni gitcham dilgipa DD Lapang, 2018 bilsio Congress dolko watenba National People’s Party (NPP)-o napskaahachim aro uandaken da·o ua a·doko NPP-chi dilenggipa MDA sorkarini chief adviser ong·e kamko ka·engachim.
Indake ong·engon, gisiko saaniko man·esa Lapang, Congress doloni ong·katahachim indiba da·o ua Congress-ona re·bapilna nangnikengaha ine MPCC-ni president parakataha.
“Lapang-ko Congress-ona re·bapilchina nangnike district committee-rangba chittirangko seataha aro ua ru·utbea bilsirangna Congress dolo donge kamko ka·ahani gimin dingtang dingtang mondolini dilgiparangba uko Congress dolona re·bapilaniko nangniktokenga,” ine Pala aganaha.
Pala-ni aganani gitade, Ri Bhoi a·jaoba Lapang-sa Congress dolko bilakbatataha aro Mayralborn Syiem baksana Charles Marngar gita dakgipa Congress-ni dilgiparangkoba uasa Congress dolo kamko ka·china didiahachim.
“Uni gimin ta·raken uko anga Congress dolona re·bapilchina nangnikenga indiba ia pilakan uni skaosa ong·aigen,” ine Pala aganaha.
AICC-ni permission-ko man·ahaon ua Lapang-ko iani bidingo gronge agangriktaigen ineba ua parakataha.