SHILLONG: Meghalaya a·doko skulni session-ko mikkang bilsiona ra·doatani bidingo da·o dipet sorkari chanchia dongkuja ine u·iataha.
“Da·o dipet iani bidingo chinga chanchia dongkuja aro somoi sokahaon chinga chanchie ja·kuko de·anggen,” ine a·dokni Education Minister Lahkmen Rymbui parakataha.
Re·anggipa bilsiode a·doko skanggipa changna COVID-19 giproroani somoio skulni session-ko ia 2021 bilsini March-April jaona sorkari ra·doatahachim ine nikna man·a. Education department-ni songe on·gipa committee-ni ku·pattie on·anio pangchake syllabus-koba 30 percent komiatahachim.
Class IX-ni internal exam-ko mikkang bilsio ong·atchina ku·pattianiko sorkari ra·chakahama ine sing·on, iani bidingoba sorkari chanchia dongkuja ine Education Minister parakataha.
Chatro chatrirangni namgnina skigiparang, course-rangko matchote ra·na man·na gita Class IX-ni porikkakoba Class XI-ni porikka baksa 2022 bilsini February jao apsan ra·china Federation of All School Teachers of Meghalaya (FASTOM), Meghalaya Board of School Education (MBOSE)-ko didiahachim ine nikna man·a.