SHILLONG: Assam aro Meghalaya a·dokni sima jolrango songdongenggipa manderangna ka·dongataniko on·na man·na gita ia a·dok damgnini chief minister, ia jani gnigipa ba gittamgipa antirango meligrikna man·jaenggipa simarangko re·ange niegen ine u·iataha.
Iani bidingo kobor ra·timgiparangna u·iatengon, ua iani bidingo Assam a·dokni chief minister baksa ku·siliting gita agangrike joint committee-rangni report on·ani tarikko ra·doatna tik ka·angaha ine Meghalaya a·dokni Chief Minister Conrad K Sangma parakataha. Ia joint committee-rangni report-rangko October 30 tarikni gisepon on·ani ong·achim indiba a·dok damgnion by-election-rang dongani gimin report on·ani tarikko antigni ba antigittamona ra·doatskana tik ka·angaha ineba Chief Minister parakataha.
“November 10 aro November 15 tarikni gisepo chinga sakgnian ia biaprangko re·ange niegen,” ine Sangma aganaha.
Da·o dipet ia biaprangko niena gita tarikko name tik ka·kuja ine talatangengon, committee-rangni report-ko on·na skangan a·dok damgnini chief minister-rang, ia biaprangko niegen ine Meghalaya Chief Minister parakataha.
Chief Minister-ni u·iatani gitade, uamangni re·ange niena sienggipa biap damgittamko uamang sakgnian seoke donmanaha aro uamang ia biaprangona re·ange manderangna ka·dongatanirangko on·anggen.
August jao ia a·dok damgnini chief minister-rang Guwahati-o tom·e chanchirimanio tik ka·gimin gita ia a·dok damgnini songgimin regional committee-rang, batanggimin jagnini gisepo, meligrikna man·jaenggipa simarangona re·ange obostarangko nieahachim ine nikna man·a.
Meghalaya aro Assam a·dokni gisepo meligrikna man·jaenggipa dam 12 songrangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.