TURA: Chang 44-gipa 100 Drums Wangala Festival ba dama bol 100-ko doke Wangala
manianiko mijal Bristibar salni bako Chibragre-ni Wangala A·damo a·bachengataha aro ia
skanggipa salo Handloom & Handicraft Exhibition-ko a·bachengate on·angan baksana jatni kal·susaanirangkoba ong·atangaha.
100 Drums Wangala manianiko a·bachengatani somoio Garo Hills Autonomous District Council (GHADC)-ni Chief Executive Membor (CEM) Benedic R Marak, mongsonggipa sokgipa ong·e bakko ra·angaha aro unbaksa GHADC-ni Chairman Rakesh A Sangma, gipin MDC-rang, Nokma Council-ni president SG Momin aro Hundred Drums Wangala Festival Committee (HDWFC)-
ni dilgiparangba dongpae bak ra·angaha.
Ia 100 Drums Wangala manianiko a·bachengatani somoio GHADC-ni CEM, jinmana aganprakangengon, A·chikrangni daka rikanirang gimaroroangengaha ine nikesa ia 100 Drums Wangala manianiko 1978 bilsi dipet a·bachengataha ine ia manianiko a·bachengdilanggipa manderangko mittelpilangaha.
Ia 100 Drums Wangala manianiko Chibragre Wangala A·damo gnigipa changna ong·atenga ine janapatengon, mikkangchi ia Wangala A·damo A·chikrangni daka rikani aro jatni gamchatgipa bosturangko donna nangchongmota ine Marak didiangaha.
Mikkangchi ia biapo 100 Drums Wangala manianiko nambate ong·atangna gita GHADC-ba man·a gita dakchakanirangko on·angkugen ineba GHADC-ni CEM, ku·rachakaniko
on·angaha.
Ia 100 Drums Wangala manianio Handloom & Handicraft Exhibition-koba GHADC-ni CEM, do·ga oe on·angjolaha.
Ia 100 Drums Wangala manianiko a·bachengatani salo, Jakpong Pe·a, Rong·ma Chilsusaa, Rong·ma Gosusaa, Wa·pong Sika, An·ding Oka aro uandakgipa jatni dingtang dingtang kal·susaanirangkoba ong·atangaha aro ia salo Chibok dol aro Koch dolrangni chrokanikoba nikangna man·aha.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e 
manirongbaenga ine nikna man·a.
Ia 100 Drums Wangala manianiko da·al aro knal salni bakoba ong·atangkugen aro ia salgnini gisepo, jatni kal·susaanirang, budu salgrikani, Aji-Doro susaani, Rugala, Cha·chat So·a, Dani Doka aro dama bol 100 doke Wangalanikoba nikangkuna man·gen.
Gnigipa salo Selsella-ni MLA FCA Sangma mongsonggipa sokgipa ong·e bakko ra·anggen aro bon·kamgipa salo, Meghalaya a·dokni Chief Minister Conrad K Sangma, mongsonggipa sokgipa ong·e bakko ra·angskagen.