TURA: PHE department-o Muster Roll-ni kamko ka·enggipa manderang, re·anggipa August jaonin an·tangtangni man·na nangkuenggipa dormaharangko man·tokkujaengani a·sel neng·nikanikrangko chagrongna nangtokengaha ine All Meghalaya Muster Roll Progressive Workers’ Union (AMMRPWU) Garo Hills Zone parakatenba, Muster Roll worker-rangni man·na nangkuenggipa dormaharangko ta·raken on·china sorkariko didiataha.
AMMRPWU Garo Hills Zone-ni president Polsing Momin-ni parakatani gitade, PHE department-o kam ka·enggipa Muster Roll-rangsan ong·aigija Horticulture aro Water Resources department-rango kam ka·enggipa Muster Roll worker-rangba an·tangtangni bang·pagija man·enggipa dormaharangko somoi gita man·rongjaenga aro iani a·selan Muster Roll worker-rang neng·nikanirangko chagrongna nangrongengachim.
“PHE department-ni mitam division-rangde August jani dormahako man·tokaha indiba Tura, North Tura, Williamnagar, Baghmara aro uandakgipa division-rangode da·onan August jaoni October jaona kingking dormaharangko man·tokkujaenga. Adita salrangna skang ong·atanggipa by-election-na skangan August jani tangka paisarang sokahachim indiba da·o November ja ong·pilona kingkingan dormaharangko on·tokkujaenga,” ine Momin parakataha.
2020 bilsini September ja dipetan Muster Roll-rangna dormahako jaanti on·china sorkari, department ge·antinan order-ko on·manahachim ine janapatengon, maini a·sel Muster Roll worker-rangna jaanti dormahako somoi gita on·na man·jaenga department ge·antinan Muster Roll association-na talataniko on·na nanga ine AMMRPWU-ni president dabiangaha.
Union-ni dabiani gita Muster Roll worker-rangna, uamangni man·na nangkuenggipa dormaharangko ta·raken on·jagenchimode jingjengatanirangko dakna a·bachengatgen ineba AMMRPWU-ni president mikrakataniko on·angaha.