TURA: North Garo Hills a·jao donggipa Mendipathar College-ni bilsi 50 gapaniko manianio Meghalaya a·dokni Chief Minister Conrad K Sangma-ba Budbar salo bakko ra·angpaaha aro ia salo ua Mendipathar College-na pilak nanga dakchakanirangko on·na gita ku·rachakaniko on·angjolaha.
Ia college-ni bilsi 50 gapaniko manianio a·dokni Chief Minister baksana Education Minister Lahkmen Rymbui, Meghalaya Assembly-ni Deputy Speaker Timothy D Shira, Kharkutta-ni MLA Rupert Momin aro Bajengdoba-ni MLA Pongseng Marak-ba dongpae bak ra·angaha.
Ia tom·aniko ong·atanio a·dokni Chief Minister, jinmana aganprakangengon, Mendipathar College-ko sorkarini jako ra·china dabienggipani bidingo janapatenba, ia college-na pilakni gitan dakchakanirangko on·na sorkari cholrangko sandigen ine parakangaha.
Meghalaya a·doko lekka porani gadangko namdapatna gita MDA sorkari rake kamko ka·enga ine ua parakataha.
Sangma-ni aganani gitade, 2018 bilsini Assembly election-na skang uni manderangna ku·rachakgimin gitan ua a·doko lekka porani kamrangna gisik on·bate kamko ka·enga aro uandaken uni sorkari State Education Policy-koba tarie on·anichi a·doko lekka porani gadangko tang·doatna krenge kamko ka·enga.
A·doko lekka porani kamrangna uni sorkari bilsio gong kror 2000-na baten koros ka·enga ine janapatengon, a·doko lekka porako tang·doatna gita indita tangka paisarangko koros ka·engoba ia tangkarang chu·ongkujaenga ine Chief Minister parakataha.
Meghalaya a·doko LP skul nokrangkoba ia sorkari taridape on·enga ine janapatengon, batanggimin somoirango a·dokni dam 200 LP skulrangko taridapna gong kror 100 tangkarangko chame on·aha aro da·o dam 300 skulrangko namdapatna gita sorkari cholrangko sandienga ine Sangma parakataha.
A·doko chatro chatrirang bang·batrorobaengani gimin bang·bata college-rangko kulidapna aro college-rango biaprangko ong·katatna nangengani giminba ia tom·anio ua janapangaha.
Ia tom·anio a·dokni Education Minister Lahkmen Rymbui-ba jinmana aganprakangengon, a·doko poraienggipa chatro chatrirangni namgnina scholarship-rangko bariataha ine parakangaha.
Education Minister-ni parakatani gitade, chatro chatrirangna uamangni gadangni kri scholarship-ko gong 15,000-ona bariataha aro merit scholarship-koba japrako gong 60/- ka·e on·gipako gong 600/-ona bariataha.
Ia tom·anio dingtangmancha Mendipathar College-ni bilsi 50 gapani souvenir-koba Chief Minister aro gipin dilgiparangni jakchi oprake on·angjolaha.
Mendipathar College-ko 1971 bilsio kuliahachim aro ian private college-sa ong·genchimoba University Grants Commission (UGC)-ni recognised ka·gimin college ong·e da·o North Eastern Hill University (NEHU)-ni ning·o donatako man·gimin college ong·engachim. Ia college-o da·o dipet IT aro Arts stream-ni dingtang dingtang course-rangko on·enga aro ia course-rangoni mongsongbatgiparanga, BA aro Certificate ong·enga.