TURA: West aro North Garo Hills a·jani ning·o donggipa B Mahal-ni bidingo social media-rango jangbingbanganirangko nikna man·engani gimin B Mahal-ni ning·o donggipa a·arangko ra·sekna ba pale cha·na miksonganirang dongja indiba ia jolrango namroro silroroaniko ra·bana aro jolo songdongenggipa manderangna chel·chakaniko on·na ja·ku de·anisan ong·aia ine Bristibar salo GHADC talataniko on·angaha.
GHADC-ni chief executive membor (CEM) Benedic R Marak, an·tangni man·gninasa B Mahal-ni ning·o donggipa a·arangko pale cha·na miksongenga ine GSMC Pedaldoba regional unit-ni chairman Rimjen Ch Sangma matnanganirangko dakengani gimin GHADC, ia talaniko on·angaha.
GHADC-ni CEM, B Mahal-ni a·arangko pale cha·na miksongenga ine matnanganirangko dakenba, dingtang dingtang biaprango jinma tom·bimonganirangkoba ong·atengachim ine nikna man·a.
Iani bidingo talataniko on·angskaengon, “October 30 tariko dingtangmancha jinmana talataniko on·angan baksana re·anggipa November 6 tarikoba jinma tom·aniko ong·ate iani bidingo songni nokni manderangna agan-talate on·aha aro ia talataniko songni manderang namnike ra·chaktokaha. B Mahal-ni bidingo Executive Committee-ni miksonganirangko manderangna talate on·aha aro manderangkoba uamangni ma·sina nanganirangko sing·e ra·china cholko on·e ma·sisretani aro jajaanirangko talate on·na man·aha,” ine Executive Committee-ni Secretary parakataha.
B Mahal-ni ning·o Meghalaya Battalion Camp, Solar Park aro dingtang dingtang ge·a gamani cholrangko ra·gatna miksonganiara songni nokni manderangna janggi tangani cholrangko on·na aro chel·chakanirangko on·na miksonganisa ong·enga ineba GHADC-ni official talataniko on·angtaiaha.