SHILLONG: Meghalaya a·dokni Khasi aro Garo ku·sikrangko Constitution-ni Eighth Schedule-o ra·gataniko Rajya Sabha-ni MP Rakesh Sinha-ba namnikpaaniko parakataha indiba Inner Line Permit (ILP)-ko ra·gatchina dabienggipani giminde ua ma·mong aro a·dok sorkarini dilgiparangon pakwate on·angaha.
Mongolbar salo Sad Suk Mynsiem-ko manianio bak ra·ani ja·man kobor ra·timgiparang baksa agangrikengon, a·dokni mongsonggipa ku·sikrangkode Eighth Schedule-o ra·gatna nangenga ine Sinha parakataha.
“Khasi ku·sikko jakkalgiparang batrorobaengaha ine anga nika, uni gimin Khasi ku·sikko Eighth Schedule-o ra·gatgen ine anga ka·dongenga,” ine ua aganaha.
Rajya Sabha-ni MP Rakesh Sinha, Kongthong songko namroro silroroatna gita jako ra·ahachim aro ua an·tangkoba saksa Tribal ine ra·china gita nangnikengachim.
“Angni chanchiani gitade Khasi ku·sikara manderangni gisepo mingsa bilakgipa ku·siksan ong·aija indiba ian an·chingni songsal aro daka rikaniko mesokna jakkalgipa ku·sik ong·a,” ine Sinha aganaha.
Meghalaya a·doko ILP-ko ra·gatchina dabienggipani gimin sing·on, “Meghalaya a·dokona re·baon anga minggni miksongani gnangsa re·baaha aro uan manderangna cholrangko on·na aro angni deragatgipa songko jako ra·ani ong·a,” ine Sinha aganchakaha.
Meghalaya a·dokona re·baengon ua an·tangni chanchianirangko, ku·sikko, jat aro torom baksana politics-ko New Delhi-o donesa re·baenga ineba Rajya Sabha MP aganaha.
“Iandakgipa kamrangni giminde ma·mong sorkari, jolni MP-rang, gipin MP-rang aro MLA-rang an·tangtangan jako ra·e nirokatchina. Meghalaya a·dokni MLA aro MP-rangan bilakgipa aro ra·chakna man·giparang ong·a aro uamangni kamo anga jakko on·pana gita nangnikja,” ine Sinha, ILP-na dabienggipani bidingo parakataha.