TURA: Adita salrangna skang, Dalu-ni bilsi 17 ong·gipa me·chik bi·sa saksako ka·saninggija dake so·ote galaniko jegalna gita Sombar salo, South aro West Garo Hills a·jani dingtang dingtang NGO-rang, songni nokni dilgiparang baksa nangrime jinma tom·bimonganiko Dimapara kal·chakramo ong·atangaha.
Ia me·chik bi·sa, re·anggipa December 1 tarikonin, an·tangni SSLC selection test-ko sena re·angaoni gimaahachim aro uni manggisiko Sonibar pringosa Dimapara joloniko man·aiahachim.
Indake ong·engon, ia me·chik bi·sako ka·saninggija dake so·ote galahani gimin South Garo Hills aro West Garo Hills a·jani NGO-rang baksana, ia jolrango songdongenggipa manderang, jegalgrimna gita aro dos dakgipa manderangko ta·raken rim·china dabie, Sombar salo jinma tom·bimonganiko ong·atangaha.
Ia tom·aniko ong·atanio dingtang dingtang dolni dilgiparang aro songni nokni dilgiparang, jinmana aganprakengon, ia me·chik bi·sako ka·saninggija dake so·ote galahani gimin raken jegaltokaha aro ia me·chik bi·sako so·otanio jak donggipa manderangko ta·raken rim·china gita sorkario dabiangtokaha.
Ia tom·bimonganiko ong·atani ja·man, jinma re·jomanikoba Dimapara-oni Dalu-ona ong·atangaha, jeon dingtang dingtang dolni dilgiparang, membor-rang, skulrangko chalaienggiparang aro songni nokni bang·bea manderangba bakko ra·angtokaha.
