SHILLONG: Meghalaya a·doko Bharatiya Janata Party (BJP)-ni bang·a dilgiparangan, BJP-ni state president Ernest Mawrie-ko ra·galchina dabitokengon, BJP-ni state vice president aro Tura-ni MDC Bernard N Marak-de una chakpaaniko parakatskaaha.
Rajabala by-election-o BJP-ni amako man·anina Ernest Mawrie saksankode dos galna man·jawa ine talataniko on·angengon, ua mandal-o BJP-ko kim·kim ong·atna man·kujaenga ine nikgenchimoba Garo Hills-ni dilgiparangan ia by-election-o BJP-ni candidate-ko susaatchina didiaha aro ia by-election-o amako man·anina BJP-ni dilgiparang pilakan dosko ra·na nanga ine Marak parakataha.
“2023 bilsini Assembly election-ode chinga apsan gualaniko daktaijawaha aro constituency ge·prakon BJP-ko kim·kim ong·atkujaskal candidate-ko donjawa. A·doko BJP dolkoba Congress aro gipin bilakgipa dolrang gitan bilakatna a·dokni dilgiparang, district-ni dilgiparang, morcha-rang aro mandalrang rakbee kamkko ka·engani gimin doltangni kosako chakatenggipa manderang, iandake BJP-ni dilgiparangko skatang matnangna nangja,” ine Tura-ni MDC parakataha.
A·doko BJP bilakbatrorobaengaha aro 2023 bilsini Assembly election-na a·jarango, morcharango aro mandalrangoba BJP-ni dilgiparang pilakan rakbee kamrangko ka·tokenga ine janapatengon, a·doko dilgiparangni ja·ku de·aniara ma·mongo dilgiparangni nangnikani gitasa ong·engani gimin doltangni kosako chakatenggipa manderang, a·doko dilgiparangni ja·ku de·aniko mande ra·na nanga ine Marak parakataha.
Doltangni kosako chakatenggipa manderang, dilgiparangko matnange dongana bate doltangko bilakbatatna gitasa re·mikkangbae apsan kamko ka·na nanga ineba Tura-ni BJP MDC parakataha.