A·doko niam gri koela bikotaniko champengjaode aino pangchake sorkarini kosako ja·kuko de·gen: Mukul

SHILLONG: Meghalaya a·doko niam gri koela bikote salruraanirangko nikengoba a·dok sorkari, nikja dake dongenga aro niam gri koela bikotaniko jegalna jotton ka·enga ine Mongolbar salo, All India Trinamool Congress (AITC) Meghalaya unit-ni parliamentary party-ko dilenggipa Dr Mukul Sangma matnangatenba, a·doko niam gri koela bikote salruraaniko champengjagenchimode mikkangchi aino pangchake ja·kuko de·na draatako man·gen ine mikrakataniko on·angaha.
A·doko niam gri koela bikote salruraaniko sorkari nikja dake dongengani a·selsa niam gri koela bikote salruraanirang batroroenga ine janapatengon, niam gri koela bikote salruraaniara MMDR Act 1957-ni niamo pangchake rakgipa sastirangko man·na kraa ine Dr Sangma parakataha.
Meghalaya a·dokko aro a·doko songdongenggipa manderangko chel·chakna gitade MMDR Act-ni Section 21-o on·gimin niamrangara iandakgipa niam gri dakaniko champengna dongimin niamrangan ong·a ine mande sakantian gisik ra·na nanggen ine Dr Sangma parakataha.
Meghalaya a·dokni South West Khasi Hills, West Khasi Hills, South Garo Hills aro East Garo Hills a·jao donggipa koela a·damrango ong·enggipa obostarangko name ma·sichengna nanga ine janapatengon, ia a·jarango ong·enggipa obostarangko name ma·sigenchimode, a·doko niam gri koela badinganiko sorkarini changni chang jegalaniara niam gri koela badingenggipa manderangna chakpaaniko mesokani ong·enga ine ma·sina man·gen ine AITC Meghalaya Unit-ni dilgipa parakataha.
“A·dokko chel·chakaniara sorkarini daitoan ong·a indiba a·dokni namgnina kamrangko chu·sokatna man·jaenga ong·ode uamang a·songni dongimin niamo pangchake aganchakaniko on·na nanga,” ine Sangma parakataha.
A·doko niam gri koela aro a·ningni gipin bosturangko bikotna man·aniara bobil dake chakatgipa dolrangko ong·katbataina cholko on·ani gita ong·gen ine adita salrangna skangsan ua, a·doko niam gri koela bikotaniko champengatchina gita a·dok sorkariko didiangahachim ine nikna man·a.