TURA: Meghalaya a·doko Krismasna skangan COVID-19-na tika su·aniko matchotatna sorkari manchimanahani gimin North Garo Hills a·jaoba tika su·kugijagipa manderangko aro gnigipa pongko su·na somoi ong·enggipa manderangko su·na gita December 20 aro 21 tarikrango salgnina North Garo Hills a·jani District Administration aro Health department nangrime, special vaccination campaign-ko Bajengdoba block-ni ning·o donggipa dingtang dingtang polling station-rango aro songrango ong·atangaha.
Ia tika su·ani program-ko election-ni bewalo ong·atahani gimin Bajengdoba block-ni ning·o donggipa pilak polling station-rango tikarangko su·angaha indiba bang·a songrangon ia tikani gimin ong·gija dake ma·sisrettokengani a·sel manderang tikarangko su·e ra·na gong·tokjaengani gimin tika su·gipa dolrang, songo nokonaba re·e walona kingkingan tikarangko su·e on·angaha.
Ia tika su·ani gnigipa sal, chong·motan Mongolbar salo, North Garo Hills a·jani Deputy Commissioner RP Marak aro Additional Deputy Commissioner ZJ Sangma-ba, tika su·chakenggipa biaprangona re·ange obostarangko nirokeaha.
Indake ong·engon, re·baenggipa January jao, North Garo Hills a·jani Resubelpara aro Kharkutta block-ni ning·o donggipa polling station aro songrangoba apsan daken COVID-19-ni tikarangko su·e on·anggen ine North Garo Hills a·jani official-rang u·iataha.
Photo: North Garo Hills a·jani Bajengdoba block-o salgnina special vaccination campaign-ko ong·atanio tika su·gipa dolrang, walchippile manderangko tika su·e on·enga.