NEW DELHI: Meghalaya a·doko niam gri koela bikotaniko champengatani a·sel a·dokni karkanarangko chalaianiosan ong·aigija gipin a·songrang, jekai Nepal, Bangladesh aro uandakgipa samba jolni a·songrangoba dingtang dingtang karkanarangko chalaianio neng·nikanirangko chagrongna nangenga ine kobor on·aha.
Koborko on·ani gitade, Meghalaya a·doko niam gri koela bikotaniko champengata intalan Nepal a·songo cement aro ita tarigipa karkanarangona Meghalaya a·dokoniko koela salangenggiparang bon·chongdikatako man·e ia karkanarangko chalaianioba neng·nikanirangko chagrongna nangengaha. Nepal a·songni ita karkanarang 75 percent-ni gitade koelarangko Meghalaya a·dokonikon ra·angengachim ineba kobor on·timgiparang u·iataha.
Meghalaya a·doko koela bikotaniko champengatani ja·man India a·songo man·gipa koelarangko ning·o donggipa karkanarangnasan on·china ge·etaniko on·manahani gimin ita tarigiparangba koelarangko, US, Indonesia aro uandakgipa a·songrangoniko ra·bana draatako man·skaahachim indiba koelarangni dam changgni batskaani a·sel karkanarangba Meghalaya·dokoniko ra·angenggipa koelarangon pangchakna nangtokaia ine kobor on·timgiparang aganaha.
Koelani dam, toni dam aro labour-rangni damba bariahani a·sel Nepal a·songode itani dam 25 ba 30 percent-chi batskagnok ine kobor on·timgiparang parakataha.