SHILLONG: Meghalaya a·dokni GVK-EMRI-o kam ka·enggiparang, an·tangtangni dabianirangko sorkarini knachakjaengani gimin re·anggipa Sombar waljatchionin kamtangtangko ka·gija jingjengattokengon, Budbar salo Health department-ni Principal Secretary Sampath Kumar, Meghalaya EMRI Workers Union-ni dilgiparangko gronge, uamangni dabianirangko niatna ku·rachakenba, uamangni jingjengataniko ra·galchina didiangahachim indiba GVK-EMRI-o kam ka·giparangni dabianiko chu·sokate on·na gita sorkari see on·kujaskal, jingjengataniko dontongjawa ine Meghalaya EMRI Workers Union parakatskaaha.
“Health department-ni principal secretary Sampath Kumar ching baksa dikdiksana tom·e chanchirimaha aro ua chingni dabianirangko niatna gita ku·rachake, chingni jingjengataniko ra·galchina chingko mol·molahachim indiba chingna sorkari see on·jaskal chingni jingjengataniko dontongjana chinga tik ka·skaaha,” ine Budbar salo, Meghalaya EMRI Workers Union-ni president Microlina Syiemlieh parakatkaaha.
GVK-EMRI-o kam ka·enggiparangni dormaharangko bariatchina, uamangni kamrangko regularise ka·china aro uandakgipa gipin dabianirangko knachakjaengani gimin re·anggipa Sombar waljatchi dipetan EMRI-o kam ka·enggiparang kamtangtangko dontonge jingjengatengachim ine nikna man·a.
Indake ong·engon, GVK-EMRI-o kam ka·enggiparangni dabianirangko sorkari knachakjaengani gimin Hynniewtrep National Youth Front (HNYF)-ba suk ong·gijaniko parakatenba, uamangni jingjengatanio bakrimaniko on·na ku·rachakataha.
“GVK-EMRI-o kam ka·giparangna chinga chakpaaniko on·gen aro kam ka·giparangni dabianirangko knachakjagenchimode chinga bilakbate jingjengatanggen,” ine HNYF-ni president Sadon Blah parakataha.
Meghalaya a·doko 108 Service-ko chalaienggipa company, kam ka·giparangna simsakjan baksana kamrangkoba name ka·jaenga ine matnangatengon, ia company-ni contract-ko ra·dodapgija, ta·raken bon·atchina gita HNYF, a·dok sorkario dabiangaha.