WGH-ni a·kawe jolrango donggipa health centre-rangko sorkari ra·doata

 

TURA: Mijal Sukrobar salni bako, Meghalaya a·dokni Chief Minister Conrad Sangma, West Garo Hills a·jani a·kawe jolo donggipa Bhaitbari community health centre (CHC) aro Chibinang primary health centre (PHC)-ko kulie on·angaha aro Batabari-o rikna sienggipa PHC-na kanggimin biapkoba niangjolaha.

Ia health centre-rangko kulie on·angani somoio a·dokni Chief Minister baksana Rajabala-ni MLA Abdus Saleh, Phulbari-ni MLA SG Esmatur Momin, West Garo Hills a·jani Deputy Commissioner Ram Singh aro dingtang dingtang officer-rangba dongpae bak ra·angaha.

Bhaitbari-o gital kuligipa CHC-ko nokdonggae on·angani somoio a·dokni Chief Minister, jinmana aganprakangengon, Bhaitbari PHC-ko da·o CHC-ona ra·doatahani gimin ian songni nokni manderangna aro chel·a biaprangoni re·bae sanna bananirangko ra·enggipa manderangna bang·a namgni ong·gnok ine parakangaha.

Chibinang PHC-ko kulie on·angani somoio Chief Minister Conrad Sangma, jinmana aganprakangskaengon, ia PHC-ko kulie on·aniara songadam nokadamrango donggipa manderangna sanna bananirangko nambate on·na MDA sorkarini ku·rachakgimin kamrangoni mingsako chu·sokatani gita ong·enga aro ian Chibinang jolo songdongenggipa manderangnasan ong·aigija jolo donggipa diltugipa songni manderangnaba namgni ong·gnok ine parakangaha.

Batabari songoba PHC-ko rikna gita sorkari kamrangko ka·engahani gimin ua apsan salon, ia PHC-na kange dongimin a·arangko health department-ni official-rang baksa niangaha.

Iana skang ua, Jal Shakti Ministry-ni ning·o Water Resources department-ni Selsella Block-ni ning·o donggipa Bolbolgre songo a·bachengatgipa Water Treatment Plant-koba niangaha aro ia project-ko a·bachengatanichi Bhajamara GS circle-ni ning·o donggipa bang·bea nokdangrangna namgipa ringani chirangko on·na dakchakengaha ine parakangaha.

Ia apsan salon a·dokni Chief Minister, Garobadha-oni Selsella-ona aro Damalgre-oni Garobadha-ona tariangenggipa ramarangkoba niangjolaha.

Get real time updates directly on your device, subscribe now.

Comments are closed.