Electricians Assn-ni chang 11-gipa tom·bimonganiko ong·ata

Gipin biaprangoni re·bae wiring ka·enggiparangko champengangkuna tik ka·a

 

TURA: Re·anggipa January-ni 22 tariko All Garo Hills Trained Electricians Association (AGHTEA)-ni chang 11-gipa bilsini tom·bimonganiko Tura Government Girls Higher Secondary School-o ong·atangaha aro ia tom·bimonganio Garo Hills gimikni skia man·gimin electrician-rang re·bae bakko ra·angtokaha.

Ia tom·bimonganio association-ni membor-rang apsan chanchirimengon, Garo Hills-ona gipin biaprangoni manderang re·bae, nokrangko wiring ka·e on·engkuani gimin, mikkangchi iandake gipin biaprangoni re·bae maming licence gri wiring ka·e on·aniko raken champengangkuna ine jinma tik ka·e donangaha

Contractor-rangni niam gri gipin biaprangoniko Garo Hills-ona rimbae wiring aro uandakgipa bijolini kamrangko ka·aniko champengangkuna ineba AGHTEA-ni membor-rang ia tom·bimonganio manchie donangaha.

Company-rangni LT, HT, Transmission Line-rangko contract kam ka·enggiparangna kam ka·ani tangka paisarangko on·jaengani giminba ia tom·anio AGHTEA-ni membor-rang raken jegalangtokaha aro iani bidingo company-rangni kosako ja·kuko de·angna gita tik ka·e donangaha.

Electrical, supervisor contractor-rangni licence-rangko renew ka·na man·na gita Tura-o headquarter-ko donchina a·dokni Chief Minister Conrad Sangma-o dabiangkugen ineba ia tom·anio AGHTEA-ni membor-rang manchiangaha.

Indake ong·engon, AGHTEA-ni chang 11-gipa tom·bimonganiko ong·atanio association-ni gital dilgiparangkoba seokangjolaha aro seokako man·gipa manderangara, president-na Justine T Sangma, vice president-na Sengsrang R Marak, general secretary-na Pillingston T Sangma, joint secretary-na Mekabel Marak, finance secretary-na Sengrak Momin aro advisor-na Manseng A Sangma ong·a.

Iana agreba, headquarter baksa kamrangko ka·rimna gita ge 11 unit-niko sak 22 dilgiparang baksana sak 8 executive membor-rangkoba seoke donangjolaha ine u·iataha.

 

Get real time updates directly on your device, subscribe now.

Comments are closed.