GHADC-ni sak 3 MDC-rangko chairman-ni kamoniko ra·galpila

 

TURA: Garo Hills Autonomous District Council (GHADC)-o NPP-ni MDC sakgniko man·chape Executive Committee (EC)-o bakrimenggipa gimik sakgittam MDC-rangko, dingtang dingtang gadangni chairman ong·aoniko ra·galpilaha.

Koborko on·ani gitade, Garo Hills Growers Association-ni chairman Linekar K Sangma, Planning & Advisory Board-ni chairman Sengchim Sangma aro Forest Advisory Committee-ni chairman Aktar Ali-ko Mongolbar salo, GHADC-ni chief executive membor (CEM) Benedic R Marak, dingtangmancha u·iataniko on·enba, uamangni kamoniko ra·galatpilaha.

Linekar K Sangma aro Sengchim Sangma-de NPP-ni MDC-rang ong·achim indiba Aktar Ali-de Independent membor ong·achim.

GHADC-o NPP-chi dilenggipa Executive Committee-ni bang·bata membor-rangan uni kamo suk ong·tokjaengani gimin sing·on, ua GHADC-o kam ka·enggipa manderangni dormaharangko on·na gita a·dokni on·gilatenggipa aro dingtang dingtang kajinarangoniko jakkalengani giminsa MDC-rang uni kamo kusi ong·tokjaenga ine GHADC-ni CEM Benedic Marak parakataha.

GHADC-ko chalaianio aro tangka paisarangko jakkalanio a·dok sorkarini gita jak on·pana gita jotton ka·rongenga ineba Marak, an·tangni suk ong·gijaniko parakataha.

“Uamang (state NPP) chingni ma·mong baksa agangrikaniko nangnikjaenga aro chingni ma·mongni dilgiparang baksa tom·anirangkoba uamang gitasa ong·atako nangnikenga. Chinga ma·mong sorkarini dingtang dingtang dilgiparangko grongeaha aro uamangoni bang·batan GHADC-ni neng·nikanirango dakchakanirangko on·na kusi ong·tokenga. Chinga tangka paisarangko bakan man·sona ka·dongengachim. Indiba iandake chinga kam ka·aniko NPP-ni dilgiparang namnikskajaenga,” ine GHADC-ni CEM parakataha.

MDC sakgittamko chairman-ni kamoniko ra·galahani giminba NPP-ni mitam dilgiparang, CEM-ni kamo suk ong·nikgijaniko parakattokaha.

Re·anggipa December jao GHADC-o kam ka·enggipa manderangna jabrini dormaharangko Krismasna skang, ma·mongni chamatgipa tangka paisarangko jakkale on·ahani giminba NPP-ni mitam dilgiparang, Benedic Marak-ni kamo suk ong·gijaniko parakataha.

“December jao kam ka·enggiparangna dormaha on·na jakkalgipa tangkarangara ma·mong sorkarini chamatgipa Tied Funds-ni tangkarangsa ong·ani gimin ia tangkarangko dormaha on·na jakkalanide ong·jachim. Uni daka kamrang manderangni nikanio namengnaba gnang indiba iandake GHADC-na chamatgipa tangka paisarangko jakkalsretaniara mikkangchi ma·mongoniko tangka paisa nangan somoirango neng·nikanirangko man·skanaba gnang,” ine NPP MDC-rang aganaha.

Get real time updates directly on your device, subscribe now.

Comments are closed.