TURA: Garo Hills Autonomous District Council (GHADC)-o NPP-ni MDC sakgni aro Independent MDC saksako chairman-ni kamrangko ra·galaha ine Chief Executive Membor (CEM)-ni parakatani ja·man, uamang an·tangtangsa CEM-ni kamo suk ong·jae kam wataha ine MDC-rang talataniko on·angskaaha.
Garo Hills Growers Association-ni chairman Linekar K Sangma, Planning & Advisory Board-ni chairman Sengchim Sangma aro Forest Advisory Committee-ni chairman Aktar Ali-ko GHADC-ni chief executive membor (CEM) Benedic R Marak, dingtangmancha u·iataniko on·enba, uamangni kamoniko ra·galatpilaha ine re·anggipa January 25 tariko kobor on·ahachim.
Indake ong·engon, ia MDC-rangko GHADC-ni CEM ra·gala ong·ja indiba MDC-rang CEM-o ka·dongna man·jahani giminsa uko ra·galchina dabie, kamtangtangko wataha ine NPP-chi dilenggipa MDC-rang parakatskaaha.
Koborko on·ani gitade, ia MDC sakgittamna agreba, Executive Committee-o bakrimenggipa bang·bata MDC-rangan, CEM-ni kamo suk ong·jae EC-oni ong·katgrimtokaha.
“Iachi chinga indake talataniko on·na ska, chong·motan Linekar K Sangma aro EC-ni gipin MDC-rang, GHADC-ni da·o ong·enggipa CEM-o ka·dongna man·jahani giminsa kamtangtangko wataha. Chinga MDC-rang pilakan uni kamrango kusi ong·gijaniko mesokna gitasa ia ja·kuko de·aha,” ine NPP-chi dilenggipa MDC-rang parakataha.
Indake ong·engon, GHADC-ni CEM Benedic Marak, All India Trinamool Congress (AITC)-o napna miksonganirang dongani giminsa EC-o bakrimenggipa MDC-rangni namnikani gita kamrangko ka·jaenga ineba kobor on·timgiparang parakataha.
Kobor on·timgiparangni u·iatani gitade, CEM Marak baksana NPP-ni sakgipin MDC Dhormonath Sangma-ba AITC-o napangna miksonganirang donga indiba da·o dipet uamang sakgnian iani bidingo parakkujaengachim.
EC-o bakrimenggipa bang·bata MDC-rangan uni kosako chakatengoba GHADC-ni CEM Benedic Marak, kamtangko watna jechakskaenga aro kamtangtangko watanggipa chairman-rangni biapoba ua Trinamool Congress-ni MDC sakgittamna biapko on·skaaha ineba kobor on·timgiparang parakataha.
GHADC-o iandakgipa obostarang ong·engani gimin, Executive Committee-ni bilko dake nina gita Sonibar salo special session-ko ong·atchina Meghalaya a·dokni Governor Satya Pal Malik, ge·etaniko on·angskaahachim.
Indake ong·engon, a·bachengonin uni sorkari, district council-ni kamrango jak on·pana jechakahani gimin GHADC-o ong·enggipa obostarangoba uni sorkari maming jak on·paani dongjawa ine a·dokni Chief Minister aro NPP-ni national president Conrad K Sangma, ku·rachakaniko on·angskaaha.
“MDC-rangni executive committee-oni ong·katani bidingo aro special session-ko ong·ate EC-ni kosako no-confidence motion-ko ong·atani bidingo see u·iataniko anga man·soaha indiba angni a·bachengo agangimin gita chinga district council-ni kamrango maming jak on·paani dongja aro ia obostaoba chinga maming jak on·paani dongjawa. Je obostarang ong·genchimoba niam gita ong·china,” ine Sangma parakataha.