Boma gopretgipani bidingo politics kal·enga ine Conrad, Trinamool Cong-ko matnanga

 

SHILLONG: Re·anggipa Robibar attamo Shillong songjinmani Police Bazar jolo IED bomako gopretaniara a·dok sorkarini mikrake kamko ka·jaengani a·selsa ong·aha ine opposition dolrang matnangtokengon, iandakgipa obostako politics kal·na jotton ka·aniara namen kragijani ong·a ine a·dokni Chief Minister Conrad K Sangma parakatskaaha.

Police Bazar-o IED bomako gopretani ja·man, maini a·sel iandakgipa obostarang da·oba a·doko ong·kuenga ine opposition Trinamool Congress (TMC)-ni dilgipa Mukul Sangma, a·dokni Chief Minister Conrad Sangma-ko sing·doangenba, 2018 bilsina skang uni tom·tomate donanggipako NPP-chi dilenggipa MDA sorkari nosto ka·e galengaha ine matnangatahachim.

Uni iandake matnanganina aganchakaniko on·angskaengon, uamangni Congress sorkariko chalaiengmiting somoirangon uamang iandakgipa a·selrangko chagrongmangiminrang ong·ani gimin iandakgipa obostarangni bidingo politics-ko kal·na nangja ine Chief Minister parakataha.

“Iandakgipa obostarangko opposition dolrangni politics kal·na jotton ka·aniara namen kraani ong·ja aro batesa uamang sorkari baksa bakrime a·doko tom·tomaniko ra·baanio kamko ka·pana nangachim,” ine Sangma aganaha.

A·doko so·sojengjeng ong·anirangko namatna aro tom·tomaniko rakkina gitade politics kal·achi ong·ja indiba sorkari baksa bakrime agan-ku·pattianirangko on·anichisa man·gen ineba ua aganaha.

A·doko so·sojengjeng ong·aniko ra·bana jotton ka·enggipa manderangni kosako sorkari rakbatsranggipa ja·kuko de·anggen ineba Chief Minister mikrakataniko on·angaha. 

Get real time updates directly on your device, subscribe now.

Comments are closed.