NEHU Tura campus-ni gita salsani workshop-ko ong·atanga

 

WILLIAMNAGAR: Ba·ra doke cha·enggipa manderangni janggi tanganiko tang·doatna gita re·anggipa Sonibar salo, NEHU Tura campus-ni ning·o donggipa Incubation Centre baksana Tura-ni Central Silk Board-ni ning·o donggipa P4 Unit aro East Garo Hills District Sericulture Office-ni gita nangrime salsani workshop-ko ong·atangaha.
Ia program-ko ong·atanio Williamnagar-ni District Sericulture Officer Sanre Momin, rimchaksoani kattarangko aganangengon, ia program-ko ong·atahani gimin NEHU Tura campus-ko mittelpilangenba, ia program-ko ong·atanichi ba·ra doke cha·enggipa manderangna janggi tangani gadangko nambatatna chol ong·gen ine parakangaha.

Ia workshop-ko ong·atanio NEHU Tura campus-ni Pro-Vice Chancellor Dr G Singaiah-ba dongpae jinmana aganprakengon, ia program-ko ong·atani mongsonggipa miksonganian jo·ongrangoniko kilding bikote ba·ra doke cha·enggiparangna agan-skie on·na aro uamangni kamrango dakchakanirangko on·na miksonganian ong·a ine parakangaha. Jatni daka rikani aro jatni ganding chindingrangko ripinge rakkina man·na gita skango jakchi ba·ra dokani bewalko tangatpilchina gitaba ua ba·ra doke cha·enggipa manderangko didiangaha.

Ia tom·anio NEHU Tura Campus-ni ning·o donggipa Incubation Centre-ni Nodal Officer Dr Shashi Kumar-ba jinmana aganprakangengon, ba·ra doke cha·enggipa aro game ge·e cha·enggiparang, an·tangtangko NEHU-ni Incubation centre-o biming segatenba, membor ong·na aro mikkangchi nanga dakchakanirangko ra·na man·gen ine talataniko on·angaha.

Get real time updates directly on your device, subscribe now.

Comments are closed.