SHILLONG: Meghalaya a·doko niam gri koela bikotanina matnanganirang batroroengon, a·doko niam gri koela badinganiko champengna police-rang raken kamko ka·enga indiba police department-o kam ka·gipa police-rang chu·ongjaengani a·sel kamrangko ka·sokjaenga ine Mongolbar salo, a·dokni Home Minister Lahkmen Rymbui parakataha.
Home Minister-ni parakatani gitade, niam gri koela badinganikosan ong·aigija pilak ong·gija dakgipa kamrangkon champengna police-rang rake kamrangko ka·engachim indiba department-o sak 1800-mangni gita kam ka·giparang chu·ongjaengani a·sel kamrangko ka·sokjaenga.
“Bang·a manderangan a·doko niam gri koela badinganiko champengna man·jaenga ine sorkariko matnangtokenga indiba a·doko pilak ong·gija dakgipa kamrangkon chinga champengna jotton ka·enga,” ine Rymbui aganaha.
Meghalaya Police-o sak 1800-mangni gita kam ka·giparang chu·ongjaenga ine talataniko on·angengon, bangbang ong·e dongenggipa kamrangoni ge 148-mangkode gapatna gita sorkari, bakan jinmana u·iatgnok ine Home Minister parakataha.
“Indita sak kam ka·gipa manderang chu·ongjaengani a·sel police-rangba pilak kamrangkode ka·sokjaenga,” ine ua aganaha.
Rymbui-ni aganani gitade, gapatna nangenggipa ge 1800 kamrangara SI aro uni ka·mao donggipa kamrangsan ong·aia aro ia kamrangko gapatna gita MPSC-ba kamrangko ka·na a·bachengengaha.
Department-o kam ka·giparang chu·ongjaengoba police-rang, pilak ong·gija dakgipa kamrangko champengna jotton ka·enga ineba ua police-rangko mittelpile aganangaha.
A·doko koela badingenggipa aro bobil dakgipa dolrang baksa nangrime kamrangko ka·enga ine matnangenggipani bidingo janapatengon, da·o dipet iani bidingo ua maming report-rangko man·soa dongkuja indiba iani bidingo ua jechakna man·jawa ine Rymbui aganaha.
West Khasi Hills a·jani koela a·damrango bobil dake chakatgipa manderang re·ruraenga ine koborrangko man·soenggipani bidingo janapatskaengon, koela a·damrango bobil dake chakatgipa manderang dongbebea ong·ode ba iandakgipa manderangna dakchakenggipa manderang donggenchimode sorkari, iandakgipa manderangni kosako rakgipa ja·kurangko de·anggen ine Home Minister ku·rachakaniko on·angaha.
West Khasi Hills a·jani Nengchigen songo, adita sak manderang, silchidare ra·bitgipa manderangni dakchakanichi koelarangko bikotdraenga ine adita salrangna skangsan songni Nokma parakatahachim.
Indake ong·engon, a·dokni badiaba badiaba biaprango niam gri check gate-rangko songe garirangoniko kajina gildrae ra·enga ine matnanganirangko man·ahani giminba ua iandakgipa check gate-rangko sandie sorkari rakgipa ja·kurangko de·gen ine mikrakataniko on·angaha.