SHILLONG: 2020-2021 aro 2021-2022 bilsirango COVID-19 sajinmako warachakanio a·dok sorkari, gong kror 650-na baten tangka paisarangko koros ka·na gita nangaha ine Mongolbar salo, Meghalaya a·dokni Health Minister James Sangma, Assembly-o parakataha.
Mawlai-ni MLA PT Sawkmie-ni sing·anina aganchakaniko on·angengon, Health Services Directorate-ni ning·o bangki gamna nangkuenggipa bill-rang dongjaha ineba Health Minister parakataha.
National Health Mission (NHM)-ni ning·o gong kror 85 tangkarangko koros ka·enga ineba Assembly-na Health Minister parakataha.
Sangma-ni parakatani gitade, 2020-2021 bilsini gisepo DHS-MI-na gong kror 6.49 tangkarangko aro NHM-na gong kror 15.87 tangkarangko ma·mong sorkarioniko man·soaha aro unbaksana 2021-22 bilsini gisepoba gong kror 91.94 tangkarangko man·soaha.
2020 bilsini a·bachengaonin Meghalaya a·dokoba COVID-19 giprorona a·bachengahani gimin pilakni gitan neng·nikanirangko man·na a·bachengahachim aro uandaken manderangko sanna bananio aro sajinmako warachakanio sorkari, bang·a tangka paisarangko koros ka·na gita nangahachim.