TGCSU-ni election-ko ong·atchina dabitoka

TURA: Tura Government College Students Union (TGCSU)-ni gital dilgiparangko seokna gita election-ko ong·atchipkujaengani gimin GSU aro FKJGP-ni Tura Govt College (TGC) cell baksana FKJGP Garo Hills Zone-ni president Pritam Arengh, Shillong-o donggipa Higher & Technical Education-ni Director-na sedoatenba, chatro chatrirangni namgnina ia union-ni election-ko ta·raken ong·atchina didiataha.
“India a·songni pilak biaprangon university aro college-rangni election-ko bilsiantian ong·atronga indiba Tura Government College-ode 2019 bilsini September ja intalan Lyngdoh Committee Recommendation-ni Section 6.4.2-o pangchake election-ko ong·atchipkujaenga. Iani bidingo batanggimin somoirangoba college-ni chatro chatrirang, changni chang college-ni principal-ko gronge agangrikahachim indiba da·alonan election-ko ong·atchipkujaenga,” ine GSU aro FKJGP-ni TGC cell parakataha.
TGCSU-ko chatro chatrirangni bilsi a·bachengo gamenggipa tangka paisarangchisa chalaiengachim ine talataniko on·angengon, batanggimin bilsisa atani gisepo TGCSU-ni maming kamrang dongjaengoba chatro chatrirangde session fee-rangko gamna nangtokenga ine GSU aro FKJGP-ni GSU cell-rang parakataha.
Adita salrangna skang, GSU aro FKJGP-ni TGC cell-rang apsan tom·e iani bidingo chanchirimangaha ine talatangengon, chatro chatrirangni namgnina ta·raken TGCSU-ni election-ko ong·atna ge·etaniko on·china gita Education official-ko didiataha.

Get real time updates directly on your device, subscribe now.

Comments are closed.