SHILLONG: Bangladesh a·songona palsrukatenggipa kg 100-ni mande knirangko Mongolbar salo, BSF dolni sipairang, East Khasi Hills a·jani sima joloniko rim·na man·aha.
Koborko on·ani gitade, Bangladesh a·songo ‘wig’ ba knini pal jakkalgipa bostuko badinganirang batroroengani gimin Bangladesh a·songo mande kniko dam rake bretokengachim. Mande kniko Bangladesh a·songosan ong·aigija China aro uandakgipa gipin a·songrangoba dam rake breengani gimin Bangladesh a·song gitaba knirangko watatskaengachim.
Skangode, Myanmar a·song gitasa iandakgipa bosturangko gipin a·songrangona watrongachim.
Indake ong·engon, Bangladesh a·songona palsrukatna miksonge moangenggipa matchu manggni baksana mande saksakoba ia apsan salon, BSF dolni sipairang rim·na man·aha ine kobor on·aha. Rim·ako man·gipa mandeara, East Khasi Hills a·jao donggipa Lawbah songni Hilarus Marwein ong·achim aro ia mandeko BSF sipairang, an·tangni gario matchu manggniko gate international border-chipakna re·angengmitingo rim·na man·aha.