PMGKAY-ni Jan Bhagidari program-ko ong·ata

 

SHILLONG: Budbar salo, Food, Civil Supplies & Consumer Affairs department-ni gita Pradhan Mantri Garib Kalyan Anna Yojana (PMGKAY)-ni bidingo Jan Bhagidari Program-ko Shillong songjinmao donggipa Main Secretariat-ni Yojana Bhavan Auditorium-o ong·atangaha aro ia program-ko ong·atanio a·dokni Food, Civil Supplies & Consumer Affairs Minister James PK Sangma, internet gita bakko ra·angaha.

Ia Jan Bhagidari Program-ko ‘Azadi Ka Amrit Mahotsav Campaign’-ni bak gita ong·atangaha aro ia program-ko ong·atanio, Food, Civil Supplies & Consumer Affairs (FCS&CA)-ni Principal Secretary Dr Shakil P Ahammed, FCS&CA-ni Commissioner & Secretary P Bakshi, East Khasi Hills a·jani Deputy Commissioner I Laloo aro gipinrangba dongpae bak ra·angaha.

Ia program-ko ong·atanio a·dokni FCS&CA Minister, internet gita jinmana aganprakatengon, COVID-19-ni somoio kangal cholrirangna ma·mong sorkarini ra·gatgipa PMGKAY-ni mirongrangko somoi gita sokate on·engani gimin FCS&CA department-ko, fair price shop dealer-rangko, wholesaler-rangko aro ia scheme-o bak ong·enggipa dingtang dingtang dolrangkoba mittelpilangaha.

Ia PMGKAY scheme-ni bidingo talataniko on·angengon, ia PMGKAY scheme-ara sabisirangni giproroani somoio kangal cholgri ong·gipa manderangna mirongrangko indin suale on·na gita ma·mong sorkarini ra·gatgipa scheme ong·a ine Sangma parakataha.

Ia PMGKAY scheme-ko COVID-19 sabisini batrikrikaniko champengna gita lockdown-ko ra·gatengmiting somoio 2020 bilsini April jaoni June jaona skanggipa ra·gatchengahachim aro uni ja·mano lockdown-ko ra·gatrorotaina nangahani gimin ia scheme-koba kangal cholgrirangna ra·dodapatahachim. Uandaken ia PMGKAY scheme-ko ia 2022 bilsini March jaoni 2022 bilsiona bon·kame ra·dodapattaiahachim.

Get real time updates directly on your device, subscribe now.

Comments are closed.