M’laya-o skulrangko gadang dake sualanina Assembly Speaker sing·doa

 

SHILLONG: Meghalaya a·doko skulrangko gadang dake sualani gimin Meghalaya Legislative Assembly-ni Speaker Metbah Lyngdoh, gitcham sorkarirangni kamko sing·doangaha.

Meghalaya a·doko skulrangko government skul, semi-government skul, deficit skul, adhoc skul, SSA skul, RMSA skul aro uandake dingtang dingtang gadangrango suale donahachim ine nikna man·a.

Iani bidingo Assembly-ni Speaker, re·anggipa Sonibar salo, All Meghalaya Primary School Teachers Association (AMPSTA)-ni tom·bimonganio, mongsonggipa sokgipa ong·e jinmana aganangengon, maini gimin Meghalaya a·doko skulrangko bak dake sualna nangaha ine gitcham sorkarirangko sing·doangaha.

Iani bidingo ua a·dokni Education Minister Lahkmen Rymbui baksa agangrike, iako niatchina didiaha ineba Lyngdoh parakataha.

“AMPSTA-ni angna on·gipa report-ko anga poraie niaha aro uamango anga bang·en chu·sokanirangko nikna man·aha. Indiba an·chingni a·doko skulni gadangrang namen bang·aniko nike anga aiao inmana,” ine Lyngdoh aganaha.

Skulrangko bak dakgenchimode gadang gittam dakesan, chong·motan government, semi-government aro private skul gadangrangsan dongna nangaiachim ineba Assembly Speaker parakataha.

Report-ni gitade Meghalaya a·doko primary, upper primary, secondary aro higher secondary gadangrango skigiparang sak 32,000-na baten donga ineba Lyngdoh parakataha.

A·doko lekka porakon sorkari mongsongbatgipa daito gita ra·enga ine gisik ra·ataniko on·angengon, Meghalaya a·dokoba mingnamgipa skichakram biaprang dongani gimin gipin biaprangoni bang·a chatro chatrirangan poraina gita re·batokenga ine Speaker parakataha.

Chatro chatrirangna nambatgipa lekka porako on·na gita skigiparangko ku·cholsan ong·e kam ka·chinaba ua didiangaha.

Get real time updates directly on your device, subscribe now.

Comments are closed.