Zikzak-o MSME-rangni tom·aniko ong·atanga

AMPATI: South West Garo Hills a·jao Micro Small & Medium Entreprise (MSME) bading chiwalgiparang baksa apsan gronge chanchirimna gita Budbar salo, Shillong-o donggipa Reserve Bank of India (RBI)-ni gita dingtangmancha tom·aniko Zikzak Multi Facility Centre-o ong·atangaha.
Ia tom·aniko dingtangmancha bading chiwalgiparangna bank-ni cholrangko on·na, bank-rango account donggijagipa bading chiwalgiparangna bank account-rangko kulie on·na aro bading chiwalgiparangni bank-ni kamrango man·enggipa neng·nikanirangko ma·sie ra·na gita ong·atangaha.
Ia program-ko ong·atanio South West Garo Hills a·jani Additional Deputy Commissioner AVD Shira, mongsonggipa sokgipa ong·e jinmana aganprakangengon, bank-rangoniko tangka ra·srogipa manderangko somoi gita gamchina aro loan-rangko ra·engon, an·tangni miksongenggipa kamrangnasan jakkalchina gita bading chiwalgiparangko aro jolni manderangko didiangaha.
Ia program-ko ong·atanio RBI Shillong-ni General Manager (O-I-C) P Gangte, RBI-ni kamrangni gimin jinmana talate on·angengon, bading chiwalgiparangni aro mongsongbate MSME-rangni dingtang dingtang neng·nikanirangko ma·sie ra·na aro bank-ni kamrango dakchakanirangko on·na gita ia tom·aniko ong·ataha ine parakataha.
Ia tom·anio Meghalaya Rural Bank-ni Chairperson Tshering Diki-ba dongpae jinmana aganprakengon, Meghalaya a·dokara tourism-ni gita bang·a cholrang dongani gimin tourism-o bading chiwalanirangko dakna gisik nanggipa manderangde, bank-rangoniko loan ra·e tourism-o bading chiwalanirangko a·bachengna man·gen ine parakangaha.
Ia program-ko ong·atanio gimik gong kror 1.05-ni loan sanction letter-rangkoba bading chiwalgiparangna on·angjolaha.
Ja·mano dingtangmancha sing·anirangna aganchaksusaanikoba ong·atangaha aro chegiparangna boksisrangko suale on·angaha.

Get real time updates directly on your device, subscribe now.

Comments are closed.