Assam-M’laya-ni soi ka·grikgipa MoU-ko Parliament ra·chakkujani gimin nipiltaina man·kugen

SHILLONG: Assam aro Meghalaya a·dokni simarango ong·enggipa golmalrangko namatna gita a·dok damgnini soi ka·grikgipa Memorandum of Understanding (MoU)-ko Parliament-sa bon·kame ra·chakgen aro da·o dipet ia MoU-ko Parliament ra·chakkujani gimin nipiltaina cholrang dongkuenga ine Nongpoh-ni MLA aro Ri Bhoi regional committee-ni membor Mayralborn Syiem parakataha.

MoU-o soi ka·grikaiahani giminde kamrang matchotaha ong·ja ine talataniko on·angengon, ia MoU-o chief minister-rangsa soi ka·grikaha aro regional level-ode soi ka·grikjahani gimin darangba ia MoU-ni gimin aganna man·kujawa ine Syiem parakataha.

“Chingade regional committee-ni membor-rangsa ong·e sorkarina report-kosa pakwate on·aiaha aro iako pilakan name ma·sie ra·china. Meghalaya a·doko songdongenggipa manderangni namgnina aro jatni daka rikanirangko naljoke rakkina man·na gita district council, Nokmarang aro jatko dilgiparangni see rakkianio pangchake je a·arangan Meghalaya a·dokni ning·o ong·a, ua biaprangde Meghalaya a·dokon ong·na nanga,” ine Nongpoh MLA parakataha.

MoU-o taridapna nanganirang dongenga ong·ode, ia MoU-ko Parliament-ona watatna skangan a·doko songdongenggipa mande sakantikon man·chapate MoU-ko nipiltaina nanga aro ja·mano Union Home Minister baksa agangrikpiltaina nanga ineba Syiem parakataha.

“A·dok damgnini soi ka·grikgipa MoU, Parliament-ona sokangahaosa, ia MoU-ko ra·chakgenma jegalgen, ukode Parliament bon·kame tik ka·anggen. Uni gimin ia MoU-ko nipilna gita cholrang bang·en dongengkua,” ine Syiem aganaha.

MoU-ko nipiltaina gita sorkarini jechakenggipani bidingo janapatengon, ia MoU-ko ra·chaka ra·chakgijanide Parliament-ni jakosa ong·a ine Syiem talatangaha.

“Angni ma·siani gitade, MoU-o soi ka·grikaiahani giminde kamrang matchotaha ong·ja indiba Parliament-o ia MoU-ko ra·chakahaosa kamde matchotgen. Haida, a·dok damgnini simarangko nipilna gita Parliament, boundary commission-ko songnaba gnang,” ine Nongpoh MLA aganaha.

MoU-o maiba ra·chakna man·gijani dongenga ong·ode uko manderangni namgnina sorkari nipiltaina nangchongmota ineba Syiem parakataha.

A·dok damgnini gisepo soi ka·grikgipa MoU-ko ra·piljagenchimode Mallangkona jolrango songdongenggipa manderang jingjengatanirangko dakna ka·mikkenataniko on·angahachim ine nikna man·a.

Get real time updates directly on your device, subscribe now.

Comments are closed.