Tura: Mikkang bilsi election ong·na sepangani gimin Garo Hills-oba uamangni pangchakaniko bilakatna miksonganio UDP-ni youth wing, Garo Hills-oni dilgiparangko grongna gita Tura-o general meeting-ko ong·ataha. Tom·anio social welfare minister Kyrmen Shylla, Mawphlang-oni MLA Eugeneson Lyngdoh aro Garo hills-oni dingtang dingtang party-ni dilgiparang bak ra·angtokaha.
Programe-o dambonga district-rangoniko dingtang dingtang youth dilgiparangko seokangjolaha.
GSU-ni gitcham dilgipa Sengrak D Marak, party-ni central leadership-ko Garo Hills-o local ba jolni leadership-ni gimin nirokatchina mol·molangaha.
“Chinga party-na aro candidate-na rake kam ka·na gong·aigen indiba central leadership, Garo Hills a·jolni party-ko dilanio namgipa ramako mesoke on·na nangskagen. Tura-o office-ko songani bidingoba maming kobor dongkujaenga, minggipin MDC Ashahel D Shira-an an·tangni biaptangko office-na biap on·na gitba aganahachim. Office donggijade kamko ka·na neng·nika, mikkangchi name dake nirokaniko man·ode chinga ge 4-5 seat-kode on·na man·aigen ine Marak aganaha.
Indake UDP state-ni joint secretary Manbha Syiemlieh, “UDP -ko Khasi party ong·a ine agana ba chanchianiko bon·atchina agan-ku·pattiangaha.”
Uandake tom·anio gipinrangba Manbha-ni agangipa kattako ja·rike, UDP-ko Khasi party ong·a ine chanchijachina aganaha aro UDP-ara chadamberango focus ka·gipa dol ong·a ine agantokaha.
Kyrem Shylla, jean tom·anio chief guest ong·a bak ra·angaha, aro tom·anio bak ra·giparang pilakkon, uamangni neng·nikarangko central leadership-ona ra·angchina didiangaha.
Indake party memborrangko mikkangchi rakbate kam ka·angchina didiate, mikkang bilsini election-o komibeoba saksamangmangde Garo Hills-oni representative dongna gita nanga ineba aganangaha.
“Election ge·antian ra·bigipa ong·a. Indiba ia changde chinga bilakbatna ka·dongenga. Khasi, Jaintia Hills-san ong·ja maina Garo Hills-oba ku·rachakatangko chu·sokatna chinga raken jotton ka·gen. Chinga a·dokni manderangni namgnina kam ka·gen aro bilsi 2023 election-o chingan bang·bate chegen ine ka·dongsoenga, ine Kyrmen aganaha.
