Project-rangni gimin a·dokni manderang ma·sie ra·na man·na nanga: Saleng

SHILLONG: Sorkarini ra·gate on·enggipa dingtang dingtang project ba kamrangara manderangni namgnina ra·gate on·enggipasa ong·ani gimin a·dokni manderangba ia project-rangni gimin ma·sie ra·na man·na nanga ine Nationalist Congress Party (NCP)-ni state president aro Gambegre-ni MLA Saleng A Sangma parakataha.

A·doko dingtang dingtang project-rangko ra·gatengon, manderangko bak ong·atchina aro manderangni ma·sianiosa kamrangko ka·china gitaba Sangma didiangaha.

Gambegre MLA-ni parakatani gitade, Darengre-oni Nengjabolchugre songona dakanggipa ramako tarina gita 2014-15 bilsirango a·dokni gitcham chief minister Mukul Sangma-ni chawarigipani pagipa Fersen Momin-na on·ahachim aro ia ramani bidingo ua baditaba chang engineer-rang aro SDO-rang baksa tom·e chanchirimani ja·manoba ia ramako matchotatchipgija donaiahachim.

“Angni constituency-osan ong·aigija Garo Hills-ni pilak biaprangon iandake matchotgija galchipgipa kamrangni bidingo anga minister-na u·iatahachim aro kamtangtangko matchotgijagipa contractor-rangkode ‘blacklist’ ka·china anga aganahachim,” ine Saleng Sangma parakataha.

Sorkarini ra·gatenggipa kamrangara manderangnisa ong·a ine janapatengon, ia kamrangko ka·ani bidingo manderang ma·sie ra·na bil donga ine Sangma parakataha.

“Jillarango ba songadam nokadamrango sawa kamko ka·enga aro maikai kamko ka·enga, uko manderang ma·sie ra·na nangchongmota maina kamrangko name ka·jagenchimode manderang, kam ka·gipa contractor-ni kosako FIR-ko ba PIL-ko ka·na man·gen,” ine Gambegre-ni NCP MLA parakataha.

Get real time updates directly on your device, subscribe now.

Comments are closed.