TURA: Meghalaya a·dokni SSA skulrango skigiparang jabongani dormaharangko man·kujaengani gimin changni chang a·dok sorkarina sedoatani ja·manoba maming dakchakanirangko man·jaengani gimin Mongolbar salo, All Garo Hills SSA School Teachers’ Association (AGHSSASTA), a·songni Prime Minister Narendra Modi-na sedoatskaenba, skigiparangna dakchakanirangko on·china mol·molataha.
Association-ni u·iatani gitade, SSA skulrango skigiparangna ia bilsini January jaonin da·o jabongani dormaharangko man·kujaengachim aro iani bidingo skigiparang, changni chang a·dok sorkarina aro education officer-rangna u·iatahaoba maming ja·kurangko de·kujaengachim.
“Chingni man·na nangkuenggipa jabongani dormaharangara, PAB 2021-22 bilsionisa ong·a aro da·o PAB 2022-23 bilsini tangka paisarangko ma·mong sorkari on·atna skangan chingni dormaharangko on·na nangengachim. Ia PAB 2021-22-niko chingna dormaharangko on·kujaengani a·selan PAB 2022-23-ni tangka paisarangko watatanioba ja·manchakatako man·engaha. Chinga da·o jabonga ong·pile an·tangtangni dormaharangko man·kujaengani a·sel chaktopilgijagipa neng·nikanirangko chakna nangtokengaha,” ine AGHSSASTA, Prime Minister-na sedoatgipa chittio parakataha.
Ia sal somoirango GST aro dingtang dingtang kajinarang baksana pilak bosturangni damrangan tang·doengaha ine janapatengon, SSA skigiparangna ta·raken jabongani dormaharangko on·na man·na gita kamrangko niatchina skigiparang, a·songni Prime Minister-ko didiataha.