TURA: Batanggimin somoirango mikkarang dontonggija waanganichi Garo Hills-ni bang·a biaprangon chirang banne aro a·arang ruronge bang·a nokdangrangan, nok-jamrangko, bagan barirangko aro mitamrangde an·tangtangni ka·sagiminrangko gimaatna nange duko ga·akenggipa nokdangrangna dakchakanirangko on·pana gita re·anggipa Sonibar salo, ‘Music Lovers of Garo Hills’ dolni gita dingtangmancha ‘Flood Relief Concert’-ko Tura-ni District Auditorium-o ong·atangaha.
Ia concert ba ring·salrako ong·atanio Garo Hills-o mingsing minggamako man·gipa dolrang, git ring·giparang aro doka dam·giparang bakko ra·angenba, duko ga·akenggipa nokdangrangna an·tangtangni gitaba on·gilanirangko dakangaha aro unbaksana bang·a manderangan ia concert-na tangka paisarangko aro gipin nanga dakchakanirangko on·gilate, duko ga·akenggipa nokdangrangna dakchakanirangko on·atpatokaha.
Ia concert-ko ong·atanio gitrangko ring·e aro doke dam·e mesokanggipa dolrangara, Riprap, Muz, Rough Road, Silman Marak, Da Suraka aro OMP dolrang ong·aha.
Ia concert-ko ong·atani bidingo Music Lovers of Garo Hills-ni convenor Sengrak D Marak, talataniko on·angengon, Garo Hills-o mikkarang waanganichi bang·a nokdangrangan duko ga·akna nangtokengani gimin an·tangtangni man·a gita dakchakaniko on·pana miksonge ia concert-ko ong·ataha ine ia concert-o bak ra·giparangko aro concert-ni donors card-rangko ra·e dakchakanirangko on·gipa mande sakantikon mittelpilataha.