SHILLONG: Mongolbar salo, PA Sangma Fellowship for Legal and Policy Research-ko a·dokni Chief Minister Conrad K Sangma-ni jakchi Shillong songjinmao donggipa Yojana Bhawan-o kulie on·angaha.
Ia centre-ko kulie on·angani somoio a·dokni Chief Minister baksana a·dokni Law Minister James K Sangma, Chief Secretary RV Suchiang, Law department-ni Secretary CVD Diengdoh, National Law School of India University-ni Prof Sony Pellissery aro dingtang dingtang official-rangba dongpae bak ra·angaha.
Ia PA Sangma Fellowship for Legal and Policy Research-ko kulie on·angani somoio a·dokni Chief Minister Conrad Sangma, jinmana aganprakangengon, a·doko niamrangko tarigipa centre-ko nangengani gimin ia Legal & Policy Research-ko kulianiara sorkariko chalaienggiparangnasan ong·aigija a·doko songdongenggipa pilak manderangnan namgni ong·gnok ine parakangaha.
“An·chingo civil service officer-rang aro legislator-rang donggenchimoba niamrangko tarianio name u·i-ma·sigiparang ong·pajani gimin manderangni namgnina Judiciary aro Legislative-chi nangrime niamrangko tarie on·anian iani mongsongbatgipa miksongani ong·enga,” ine Sangma aganaha.
Name am·sandiani gnang niamrangko tarigenchimode pilak kamrangkon nambate chu·sokatna man·gen aro iako dakna gitara mande sakantini kamrangkon namdapatna gita nanggen ineba Chief Minister aganaha.
An·tangni pagipa PA Sangma sagini gimin gisik ra·e aganangengon, ua saksa namen mikkim gnanggipa mande ong·e Law, Journalism, Teaching aro Politics-ni kamrangko name ma·sigipaba ong·achim ine Sangma parakataha.
