SHILLONG: Re·anggipa Sonibar salo, Meghalaya Pradesh Trinamool Congress (MPTC)-ni tom·bimonganiko Jaintia Hills a·jani ning·o donggipa Mowkaiaw songo ong·atangaha aro ia tom·bimonganio MPTC-ni dilgiparang, NPP-chi dilenggipa MDA sorkarini kamrangko matnange aganangtokaha.
Ia tom·bimonganio Opposition dolni dilgipa Mukul Sangma, jinmana aganprakengon, Assam sorkari baksa Memorandum of Understanding (MoU)-o soi ka·grikanichi, Meghalaya a·dokni bang·a songrangkon Assam-o napate songni nokni manderangko cha·bokaha ine NPP-chi dilenggipa MDA sorkariko matnangataha.
“NPP-chi dilenggipa MDA sorkari, BJP-ni ge·etanichisa aro BJP-ni nangnikani gitasa Meghalaya a·dokko chalaienga,” ine Sangma aganaha.
Choligijagipa program-rangko ra·gate MDA sorkari, a·dokna bang·en noksan ong·ataniko ra·baenga ine janapatengon, “Dingtang dingtang department-rango kam ka·giparang dormaharangko man·jae sorkarini kosako jingjengatanirangko an·ching nikna man·enga. Ia pilakan MDA sorkarini, BJP-ni ning·o kam ka·ani a·selsa ong·enga,” ine Sangma aganaha.
Chadamberangna kamrangko ong·katate on·jaengani giminba ua a·dok sorkariko matnange aganangaha.
“Sorkario kam ka·giparang kamtangoni neng·takange aro mitamranga somoi ong·gija siangani a·sel kamrang bangbang ong·e dongenga. Ia bangbang ong·e dongenggipa kamrangara sorkarini gital bikotgipa kamrang ong·ja indide sorkari, chadamberangna kamrangko nakatate on·na gisik nanganian dongjaenga,” ine Sangma aganaha.
Skigipani kamko ka·enggiparangni gimin janapatengon, “Skigipani kamko ka·na sikenggipa bang·bata chadamberangan MTET-ko matchotaha aro pilak result-rangkon parakmanaha. Interview ra·ani kamrang matchotahaon skigipani kamrangko gapatgnok ine sorkari a·kangenga indiba ia kamrangko da·onan gapatkujaenga. Ia kamrangko gapate on·jaengani a·selan kam sandie dongenggipa chadamberang kamrangko ka·e cha·pana man·jaenga. Ia pilakan ia sorkarini choligijaniko mesokani ong·a,” ine Opposition dolni dilgipa parakataha.
Ia tom·anio Umroi-ni MPTC MLA George B Lyngdoh-ba aganprakengon, sima arini bidingo ia sorkari, sikkeldugae Assam sorkari baksa songgigrikaha aro da·o MDA sorkari aro regional dolrangna cholko on·taigenchimode uamang Block I aro Block-II-ni a·arangko pale cha·gen ine matnangataha.
Assam sorkari baksa songgigrikani ja·man, golmal gri ong·gipa biaprangba Assam-o napangaha ineba Lyngdoh aganaha.
“Ia songni manderang refugee-rang gitasa ong·aignok aro an·tangtangni a·ani nokgiparang ong·na man·jawaha maina uamangni a·arangko Assam sorkarisa an·tangtangni ska gita dakgnok,” ine MPTC-ni MLA parakataha.
Ia apsan salon TMC-ni office-ko Laskein-o oprake on·angjolaha.