SHILLONG: Re·anggipa bilsio Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko rim·na gita police-rangni uni nokko chadrapeanio, police-rangni chanchininggija aro nangana bate bilko jakkale ja·ku de·ahani a·selsa ua sina gita nangaha ine Justice T Vaiphei-ni inquiry report-o parakatani ja·man, Thangkhiew-ko so·otanio jak donggipa pilak police officer-rangkon niamo pangchake sasti on·china Federation of Khasi Jaintia & Garo People (FKJGP) dabiangaha.
HNLC-ni gitcham general secretary Cheristerfield Thangkhiew-ko police-rangni so·otani bidingo inquiry dakani report-ko re·anggipa Sukrobar salo, Assembly-ni Autumn Session-ko a·bachengatani somoio parakatahachim indiba ia inquiry report-o police officer-rangni bimingrangko janapjahani gimin FKJGP suk ong·gijaniko parakatskaaha.
“Maini gimin dos donggipa officer-rangni bimingko dongnuna nangaha? Ia inquiry report-ko May jaon sorkarina on·manahaoba jabrina ia report-ko sorkari donchae, Sukrobar salosa Assembly-ona ra·angaha. Iako a·dokni manderang aro chingaba raken jegalenga aro iana sorkarian dai nanggipa ong·enga,” ine FKJGP-ni president Dundee Cliff Khongsit parakataha.
Dos donggipa manderang pilakkon kakket bichalona ra·bana nangchongmota maina niamko tarigiparangde niamko pe·gipa ong·na man·ja ineba FKJGP-ni president parakataha.
HNLC bobil dolni gitcham general secretary Cheristerfield Thangkhiew-ko police-rangni pringwal 3:00 bajio rim·na re·anganiara chanchininggija kam ka·aniko mesokani ong·aha aro police-rang bilko nangana bate jakkaljagenchimode uko sianiona sokatjawachim ine ia a·selni bidingo inquiry dakgipa commission-ni report-o parakahachim.
Thangkhiew-ni nokko chadrapegipa police dol, kontagnimangna sengkuenba seng·bana on·chenge, sianggipa mande aro uni nokdangni kuturirangchi teargas grenade-ko goatgenchimode, nokni manderangko ong·katchina draatgnokchim aro unode sianggipa mandeko altuaen rim·na man·genchim aro uni nokdangni gipin manderangnaba naljokaniko on·na man·genchim ineba Inquiry Commission-ni report-o parakahachim.