SHILLONG: Re·baenggipa 2023 bilsini Meghalaya Legislative Assembly election-o National People’s Party (NPP), bang·bate seat-rangko chena man·gen aro gital sorkariko rikna gita gipin dolrangni bakrimaniko nangjawa ine NPP-ni state president aro Rajya Sabha-ni MP WR Kharlukhi, an·tangni ka·dongchakenganiko parakataha.
Mawkyrwat-o NPP Mawkyrwat Block-ni tom·aniko ong·atanio NPP-ni state president, jinmana aganprakengon, uni kobor man·soani gitade, re·baenggipa bilsini Assembly election-o NPP, bang·bata seat-rangkon chegen aro an·tangari sorkariko rikgen ine parakataha.
Khasi aro Jaintia Hills jolrangon NPP, komibeoba dam 20-oni dam 25 seat-rangkode chegen ineba Kharlukhi parakataha.
Mawkyrwat constituency-ni gimin janapatengon, Mawkyrwat-o NPP-ni manderang rake kamko ka·genchimode chegipa ong·na man·gen ine Kharlukhi aganaha.
“Na·simang rake kamko ka·genchimode darangba na·simangni chu·sokgipa ong·aniko champengna man·jawa,” ine ua aganaha.
Germany a·songko sason ka·gipa Adolf Hitler-ni gimin toe aganangengon, ua 1919-20 bilsirango saksni manderangchisan Nazi-ko bikotahachim indiba 1939 bilsini gisepon ua a·gilsak gimikko moatna man·aha ine NPP-ni state president parakataha.
Mawkyrwat constituency-o dam 62 polling station-rang gnang aro ianoni dam 55-ode NPP-ni primary unit-rangko bikotna man·aha ine talataniko on·angengon, pilak polling station-rangon unit-rangko bikote election-o chegipa ong·na man·na gita rakbee kamrangko ka·china ua, NPP-ni dilgiparangko didiangaha.