TURA: Bay of Bengal-oni ‘Sitrang’ balminduri balbaanichi Garo Hills-o aro mongsongbate West Garo Hills a·jani bang·a biaprangon bol wa·arang be·e aro nok-jamrang pe·ako man·e bang·a manderangan neng·nikanirangko chagrongna nangtokaha.
Sombar pringonin West Garo Hills a·jao mikka baksana ta·rakbee balwarang balangahanichi Sombar walode bang·a biaprangon bol wa·arangni be·anirangko aro nok-jamrangni nosto ong·anirangko nikna man·aha aro Sombar attamonin Mongolbar walona kingkingan bijolirangko aro network-rangkoba manderang man·tokjaha.
Ramarango bol wa·a be·anirangko Mongolbar salpaksachibarasa rongtalatpilna man·aha aro gari gorarangko watpiltaina man·aha. Dingtang dingtang biaprango bolrang be·dapanichi bijoli silitingrangba nosto ong·atako man·tokaha aro ia koborko seatengmiting somoiona kingkingan bijoliko man·pilkujaengachim.
Koborko on·ani gitade, ‘Sitrang’ balminduri balani Garo Hills-ni gipin a·jarangode inditana nangchakeani dongjaha indiba West Garo Hills a·jao bilongbatahani a·sel manderang neng·nikanirangko chagrongna nangbattokaha.
West Garo Hills a·jao aro mongsongbate Tura jillao bijoli baksana network-rangba nosto ong·atako man·ahani a·sel manderang, network aro internet-rangko man·jae kamrangko ka·anioba neng·nikanirangko chagrongna gita nangtokaha.
Balminduri balanio nok-jam gri ong·atako man·gipa nokdangrangna nanga gita dakchakanirangko on·na district administration aro Tura Municipal Board (TMB) kamrangko ka·engaha ineba official-rang u·iataha.
West Garo Hills a·jani Deputy Commissioner Swapnil Tembe-ni parakatani gitade, Sitrang balminduri balanichi neng·nikanirangko man·batna nanggipa biaprangara, Tura Urban, Rongram aro Gambegre C&RD Block-rang ong·aha. Tura-o komibeoba dam 10 gittimrang, Gambegre-o dam 12 songrang aro Rongram block-o dam dok songrang nangchakeaniko man·batangaha ineba Deputy Commissioner parakataha.
Da·o dipet ‘Sitrang’ balminduri balanichi nangchakea man·gipa nokdangrangko hisapengkua aro Budbar salosa chu·gimik koborko on·na man·naba gnang ineba DC u·iataha.
‘Sitrang’ balminduri balanganichi GH-o neng·nikanirangko man·anga
Date:
Share post:
