Mukroh songo a·sel ong·aniko jegale NCM-ko ong·atanga

GH-oba konta 2-na dokkanrangko chiptoka

 

SHILLONG/TURA: Re·anggipa November 22 tariko West Jaintia Hills a·jani Mukroh songo Assam police aro Forest guard-rangni skatang goanichi dosgri manderang so·otako man·na nangahani gimin Sukrobar salo, KSU, FKJGP, HNYF, RBYF aro JSU dolrang suk ong·gijaniko mesokna aro so·ota man·gipa manderangna kalimaniko mesokna gita, non-cooperation movement (NCM)-ko ong·atangaha aro NCM-ko ong·atanio bang·bata sorkari office-rangon bangbang ong·anirangko nikna man·angaha.

Shillong songjinmani Main aro Additional Secretariat office-rangoba bang·gija kam ka·giparangkosa nikna man·aiaha aro apsan daken gipin department office-rangoba officer-rangna agrede kam ka·giparangko nikna gita man·jaha.

Shillong songjinmani North Treasury aro District Tranport Office-kode chu·gimik chipe donaiaha aro Shillong-o donggipa MBOSE office-ni gate-koba chipe donaiaha.

Koborko on·ani gitade, jingjengatenggipa dolni membor-rang, mitam sorkari office-rangona re·ange office-rangko chipchina gita aganeaha.

Secretariat Hills aro Lower Lachumiere-o donggipa sorkari office-rangko man·chape pilak sorkari office-rangon chel·chakgipa sipai dolrangko chu·onga gitan donataha.

Jingjengatenggipa mitam dolni membor-rang, Dhanketi-o donggipa SBI office-onaba re·ange office-ko chipchina ge·eteaha ine kobor on·aha.

Indake ong·engon, Garo Hills-oba Sukrobar salo, 1:00 bajioni attam 3:00 bajiona dolbri NGO-rang, chong·motan ADE, FKJGP, AYWO aro FAF dolrang, non-cooperation movement-ko ong·atangaha aro ia konta gnina NCM-ko ong·atanio Garo Hills-o aro mongsongbate Tura jillao pilak dokkanrangkon chipe dontokaha.

Gari gorarangni re·ruraanirangba Tura jillao ia konta gnina adita komiaha indiba porikkarang ong·engani gimin mitam gari gorarangni re·ruraanirangkode nikskana man·aha.

Get real time updates directly on your device, subscribe now.

Comments are closed.